DILI- Sua Excellencia Sekretáriu Estadu Juventude no Desportu Eng. Abrão Saldanha hasoru malu ho Ambassador Estadus Unidus Amerika nian mai Timor-Leste, Sua Excellencia Kathleen M. Fitzpatrick, ohin loron-3 fulan-Setembru tinan-2020. Enkontru ne’e hala’o iha sala reuniaun SEJD, Lecidere, Dili.

Durante enkontru, Sekretariu Estadu ho Ambassadora Estadus Unidus nian koalia kona-ba programa sira ne’ebé mak Governu Estadus Unidus halo ona ho povu Timor-Leste, liuliu hirak ne’ebé hala’o ho juventude sira no programa Sekretaría Estadu nian ba oin. Sekretariu Estadu ho Ambassadora diskuti mós kona-ba posibilidade sira ne’ebé presiza explora atu bele hala’o liu tan kolaborasaun entre parte rua ba oin.

Sekretáriu Estadu aproveita mós oportunidade ida ne’e agradese Ambassadora Fitzpatrick, povu no Governu Estadus Unidus nian ba apoiu sira hotu ne’ebé Estadu Unidus fo ba Timor-Leste iha ámbitu luta kontra COVID-19.

“Ha’u hatene Sua Excellencia Sr. Primeiru Ministru pesoalmente agradese ona lori governu tomak nia naran, maibé ha’u hakarak atu mós agradese, tamba maioria husi povu Timor-Leste ne’ebé mak benefisia husi apoius husi Amerika ne’e, mak ami joven sira,” Sekretáriu Estadu Estadu hatete.

“Sra. Ambassadora hatene, Timor-Leste nasaun ida sei joven lòs, la’os deit tamba ami nia otas sei nurak. Maibé mós tamba 75% husi ami nia populasaun ho idade menus husi tinan 35. Tamba ne’e programa no serbisu hamutuk ho joven sira importante tebtebes no ami konta ho ami nia país amigu sira hanesan Estadus Unidus Amerika sira nia apoiu.”

#FoinSaeMillennialForsaKriativa #DesportuIhaSosiedadeNoPrestasaun

EJMG//Joqi//FBdJ//RM@copyrigthDNICT-SEJD 2020