Sekretariu Estadu Juventude no Desportu loke voleybol primeiru Divizaun ba Epoka III tinan-2020

By Admin 28 Outobru 2020, 08:33:44 TLs DESPORTU
Sekretariu Estadu Juventude no Desportu loke voleybol primeiru Divizaun ba Epoka III tinan-2020

Fotografia : S.E Eng. Abrão Nokosiku Saldanha halo abertura ba liga voleyból 1o divizaun ba epoka III tinan-2020.


Sekretáriu Estadu Juventude no Desportu Sua Excellencia Eng. Abrão Nokosiku Saldanha halo abertura ba liga voleyból 1o divizaun ba epoka III tinan-2020. Abertura jogu ne’e hala’o ohin, loron-27 fulan-Outubro tinan-2020, iha kampu voleyból SEJD, Lecidere, Dili.

Iha ninia diskursu abertura, Sekretariu Estadu fohanoin fila fali ninia promesa wainhira halo enseramentu ba kopa voleyból PNTL Cup 2020 liu ba. “Iha enseramentu PNTL Cup 2020 liu ba, ha’u promete ba jogador sira katak iha fulan-Novembru ka Dezembru nia laran sei realiza liga nasional voleyból. Maibé, ohin, seidauk to’o fulan Novembru ita hahu ona liga voleyból, ida ne’e atinjimentu pozitivu tebtebes,” Sekretariu Estadu hatete.

Sekretariu Estadu mós esplika iha ninia diskursu katak governu, liu husi SEJD, iha tinan-2021 prepara ona atu hala’o eventu desportiva, la’os deit iha nivel liga iha nasional deit, maibé sei realiza eventu desportu iha baze mós. “Tinan oin, ita sei iha desportu komunitaria, ba modalidade oinoin iha postu administrativu sira hotu iha teritoriu laran tomak. Ita sei iha mós desportu escolar ba eskola sekundaria sira, eskola privada no públiku sira hotu iha nivel munisipiu.”

“Ho ida ne’e, ita sei halo masifikasaun desportu, katak lori desportu ba sosiedade no ba fatin hotu-hotu no hela ho sosiedade, nune’e bele kontribui ba ita nia prestasaun desportiva no liu-liu atu hadiak ita nia aktividade fizika no saude.”

Liga nasional voleyból ne’e hahu iha loron-27 fulan-Outubro no sei remata iha loron-20 fulan-dezembru tinan-2020 mai.

#FoinSaeMillennialForsaKriativa #DesportuIhaSosiedadeNoPrestasaun




Hakerek Komentariu Iha Facebook

Hakerek Komentariu Iha Account Facebook

Hare Komentariu Hotu-Hotu

Hakerek Komentariu