DILI- Sekretriu Estadu Juventude no Desportu, Eng. Abrão Nokosiku Saldanha hala’o abertura ba Festival Nasional Arte no Kultura iha kalan-21 fulan-Novembru tinan-2020 iha resintu SEJD, Lecidere, Dili. Festival nasional ida ne’e inisiativa husi Prezidente da Repúblika ne’ebé hetan apoiu husi Governu.

Iha diskursu abertura ba festival, Sekretariu Estadu Juventude no Desportu hatete, “arte no kultura kompoin identidade sosiedade ida, komunidade ida nian no importante mós ba kompoin Nasaun ida nia identidade.”

“Tamba ne’e mak importante tebes atu hahu promove dezenvolvimentu arte no kultura. Sua Excellencia Prezidente da Repúblika sente importante tebes atu konsolida ita Nasaun para prepara ba harii ita nia Estadu ida ne’ebé mak hetan respeitu no dignidade iha mundo internasional,” Sekretariu Estadu hatutan.

Festival ida ne’e “hala’o iha tempu pandemia no tamba ne’e seidauk bele halo boot. Maibé governu ho Prezidensia komprometidu atu hala’o festival hanesan ne’e ho eskalaun boot liu tan.”

Festival Nasional Arte no Kultura ne’e inisia husi Prezidente da Repúblika no hetan apoiu husi Ministeriu Ensinu Superior liu husi Sekretaría Estadu Arte no Kultura, Ministeriu Administrasaun Estatal, Ministeriu Saúde, Ministeriu Edukasaun Juventude no Desportu no Ministeriu Asuntus Parlamentares no Komunikasaun Sosial.

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2020