DILI (31/05/2019) – Hare’e ba perigozu hosi impaktu uza tabako ka fuma, Sekretariu Estadu Juventude no Desportu (SEJD), Nelyo Isaac Sarmento husu ba juventude sira atu hado’ok an hosi tabako.

Sekretariu Estadu esplika, impaktu fuma tabako laos deit fo perigozu ba ema ne’ebe fuma, maibe ba sira ne’ebe la fuma wainhira besik ema ida fuma mos bele hadaet moras ne’ebe impaktu hosi tabako nian.

“Ita nia nasaun ida ne’e maioria ita nia populasaun ne’e ho idade kiik ne’ebe komsumu tabako ka fuma tabako. Koalia kona-ba future, se ita la hahu agora ho kuidado ita nia a’an rasik, oinsa mak ita koalia mak hau ne’e Timor oan,” dehan Nelyo Isaac Sarmento iha nia deskursu ba loron mundial laiha tabako, Sexta (31/05/2019), iha Resintu SEJD Marginal Largo de Lecidere, Dili.

Tuir sekretariu estadu, Timor-Leste presiza ema ne’ebe produtivu atu partisipa iha prosesu dezemvolvimentu nasional.

“Hahu agora kuidadu ita nia saude, tamba kauza husi sigaru bele hamosu moras ida mak tafui ran, moras pulmaun no moras sira seluk. Ne’e tamba sa, tamba ita nia joven sira ne’e hahu la kuidadu nia saude, oinsa mak ita bele forte, tamba sa mak ita bele garantia ita nia saude, joven sira hahu agora kuidado ita nia saude no moris saudavel atu kontribui ba dezemvolvimentu nasional Timor- Leste nian,” dehan Nelyo Isaac Sarmento.

Komemorasaun Loron Mundial Laiha Tabako ne’e organiza hosi Ministeriu Saude kopera hamutuk ho Organizasaun Mundial Saude no Polisia Nasional Timor-Leste (PNTL) ho prezensa hosi estudante hosi Eskola Sekundaria Nobel da Paz no Universidade Nasional Timor Lorosa’e (UNTL) hosi Fakuldade Medisina Jeral.

Iha komemorasaun ne’e mos halo konsulta gratuita ba moras tensaun no matan.