SEJD ho KOICA Asina Dokumentu Record Of Discussions atu hahu Projetu Desportu ba Labarik sira

By Admin 23 Agostu 2020, 18:44:29 TLs DESPORTU
SEJD ho KOICA Asina Dokumentu Record Of Discussions atu hahu Projetu Desportu ba Labarik sira

Fotografia : Sua Excellensia Eng. Abrão Saldanha, asina hela dokumentu record of discussions ho Diretor Ajensia Kooperasaun Internasional Korea nian iha Timor-Leste, Sr. Kim Sikhyon Imajen/DNICT


Sekretariu Estadu Juventude no Desportu Repúblika Demokrátika Timor-Leste nian, Sua Excellensia Eng. Abrão Saldanha, asina dokumentu record of discussions ho Diretor Ajensia Kooperasaun Internasional Korea nian iha Timor-Leste, Sr. Kim Sikhyon ohin. Seremonia asinatura ne’e hala’o iha horas tk 15.30 lorokraik HTL iha Kampu Demokrasia, Dili.

Asinatura ida ne’e sei hahu projetu kooperasaun Desportu ba Labarik Sira nia Dezenvolvimentu iha Timor-Leste. Tuir Akordu ida ne’e, Ajensia Kooperasaun Internasional Korea nian (KOICA) kompromete atu finansia projetu ida ho montante US$ 6.500.000 (Juta nen rihun atus lima dollar Amerikanu). Projetu ida ne’e sei harii Sentru Desportu Juventude foun ida no remodela kampu desportu komunitaria tolu iha Dili laran no mós fornese ekipamentus desportivu ba fasilidade sira ne’e.

Sekretariu Estadu Juventude no Desportu, Sr. Abrão Saldanha hatete, “lori povu Timor-Leste nia naran, liuliu joven sira ne’ebé pratika desportu no sira nia inan aman sira nia nara, ha’u agradese povu no governu Repúblika Korea ba apoiu jenerozu ida ne’e atu dezenvolve desportu iha Timor-Leste.”

“Ha’u mai assume kargu ida ne’e ho vizaun ida mak ‘Foin-Sa’e Millenial Forsa Kriativa’ ba dezenvolvimentu juventude no ‘Desportu Iha Sosiedade no Prestasaun” atu hametin desportu iha ita nia sosiedade no kontribui ba hasa’e liu tan Timor-Leste nia prestasaun desportivu iha nivel rejional no internasional. Ha’u haksolok tan projetu ida ne’e sei kontribui ba vizaun polítika ida ne’e atu lori desportu ba komunidade no hametin desportu iha baze,” Sekretariu Estadu hatete.

Diretor KOICA nian iha Timor-Leste, Sr. Kim Sikhyon hatete, “Timor-Leste nasaun mais joven ida iha mundu, ho idade media populasaun tinan 21, tan ne’e, importante tebtebes atu aproveita didiak populasaun joven nu’udar forsa pozitivu no orientadu ba oin ba Timor-Leste nia futuru ida diak liu. Iha pontu de vista ida ne’e, ha’u fiar katak desportu hola papel importante no inkluzivu ba hadiak liu tan joven sira nia attitude bázika nu’udar membru diak sosiedade nian atu ajuda povu Timor-Leste dezenvolve iha maneira ida kooperativu liu, no ha’u haksolok, lori povu Korea nia naran, bele hatur pillar kiik ida ne’e hodi promove desportu hanesan plataforma ba Timor oan sira serbisu hamutuk no halo Timor-Leste sai país diak liu tan iha tempu oin mai.”

Seremonia asinatura ida ne’e partisipa husi Sua Excellensia Ambassador Repúblika Korea nian mai Timor-Leste Mr. Lee Chin-bum ho Sua Excellensia Ministru Edukasaun, Juventude no Desportu Timor-Leste nian, Dr. Armindo Maia no mós autoridade munisipiu Dili, Postu Administrativu no Suku iha Dili laran.




Hakerek Komentariu Iha Facebook

Hakerek Komentariu Iha Account Facebook

Write a comment

iha 2 Komentariu ba informasaun ne'e

Hare Komentariu Hotu-Hotu

Hakerek Komentariu