DILI- Sekretáriu Estado Juventude no Desportu, Excellencia Eng. Abrão Nokosiku Saldanha hala’o enkontru ho Ambassador Portugal mai Timor-Leste iha loron-11 fulan-Fevereiru tinan-2021. Sorumutu ne’e hala’o wainhira Sekretariu Estadu simu vizita kortezia husi Ambassador Portugal iha sala reuniaun SEJD, Lecidere, Dili.

Iha sorumutu ida ne’e, parte rua diskuti kona-ba memorandu intendimentu rua ne’ebé mak Sekretaría Estadu Juventude no Desportu ho Embassada Portugal iha Timor-Leste asina tiha ona, ida iha area juventude no ida seluk iha area desportu, iha tinan-2015 liu ba. Parte rua mós koalia kona-ba programa sira seluk hanesan interkambiu juvenil, dezenvolvimentu rekursus umanus iha area desportu no seluk tan.

Sorumutu mós koalia kona-ba Timor-Leste nia preparasaun atu sai uma nain ba jogus CPLP no Timor-Leste nia partisipasaun iha jogus internasional TAFISA, ne’ebé tinan ida ne’e Portugal mak sei sai uma nain. TAFISA mak plataforma internasional ba jogus tradisional sira, ne’ebé maske Timor-Leste seidauk sai membru, maibé sei partisipa tamba hetan konvite husi Portugal, nu’udar uma nain.

Sekretariu Estadu Juventude no Desportu ho Ambassador Portugal mai Timor-Leste konkorda atu parte rua revé fila fali memorandu intendimentu sira ne’e no hahu diskusaun tékniku sira kona-ba oinsa mak bele implementa pontu sira balu memorandu sira ne’e nian.

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2021