DILI- Sekretáriu Estadu Juventude no Desportu, Eng. Abrão Nokosiko Saldanha asina nota expresaun intensaun ida ba kooperasaun ho Ambasador Korea iha Timor-leste, Lee Chen Bum. Nota ida ne’e expresa parte rua nia intensaun no interese atu hametin liu tan kooperasaun iha area desportu liuliu, iha area dezenvolvimentu futeból juvenil iha Timor-Leste.

Sekretariu Estadu Juventude no Desportu hatete, SEJD ho Embassada Korea asina nota de expresaun intensaun ida ne’e atu bele kontinua kooperasaun ne’ebé mak SEJD ho KOICA asina tiha ona iha loron-21 fulan-Agostu sobre projetu dezenvolvimentu sentru futeból juvenil iha Timor-Leste.

Koalia ba jornalista sira hafoin asinatura, Ambassador Lee Chen Bum hatete, asina nota de expresaun intensaun ida ba kooperasaun entre SEJD no Embassada Korea kona-ba apoiu ba modernizasaun iha area desportu, liu-liu iha area futeból nian liu husi harii sentru futeból juvenil iha Timor-leste.

Ambassador Lee Chen Bum mós esplika katak alen de futeból, Korea ho SEJD mós serbisu hamutuk iha area Taekwondo no epresa ninia esperansa katak bele haruka treinador taekwondo sira mai atu ajuda eleva liu tan atleta taekwondo Timor-Leste sira nia kapasidade no abilidade iha tempu oin mai.

Seremonia asinatura ne’e hola fatin iha salaun reuniaun SEJD, Lecidere Dili, loron-17 fulan-Novembru tinan-2020.

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2020