TUTUALA - Sekretáriu Estadu Juventude no Desportu (SEJD), Nelyo Isaac Sarmento enserra atividade jogu futeból tasa Komandante Nino Konis Santana iha aldeia Vero,suku Tutuala, postu administrative Tutuala, munisípiu Lautem, domingo (29/12).

Iha enserra jogu ne’e fahe mos prémiu ba kampionatu sira ne’ebé partisipa tasa rotativa Komandante Nino Koni Santana. Manan na’in dahuluk iha jogu ne’ebé halao iha Novembro no remata Dezembru 2019 ne’e mak klubu Tokodede FC hetan osan ho valor $1000 no tasa permanente. Manan na’in daruak mak FC. Jona LN hetan osan $600 enkuantu AC Mayluan okupa terseiru lugar ho osan $ 400.

Sekretáriu Estadu kongratula manán na’in sira , komisaun organizadora no família saudozu inklui parte hotu ne’ebé kontribui ona susesu atividade refere to’o remata. Nelyo Isaac  kontinua apoiu no husu ba autoridade munisípiu no família saudozu Konis Santana atu kontinua ativdade jogu futeból ne’e regular kada tinan inklui atividade desportu sira seluk hanesan voliból no basketeból.

”Tutuala oan sira labele sente kontente deit ho realizasaun tasa komandante Nino Konis Santana maibe tenki orgullu, tamba imi oferese atividade importante ba ita nia joven sira, durante fulan rua imi anima kapital munisipiu Lautem , ida ne’e mak importante ba ita nia jerasaun sira, hau kontente tebtebes ho joven sira lubuk iha ne’e, oportunidade sei mai, maibe imi tenki prontu atu partisipa iha eventu sira ne’ebe sei realiza iha tinan hirak tuir mai,” dehan Nelyo Isaac Sarmentu

Governante ne’e husu ba familia saudozu no Komisaun Organizadora atu buka mekanismu ida nebe diak atu kontinua iha komitmentu hodi realiza iventu refere iha tinan sira tuir mai tanba durante tinan naruk Lautem maten ho atividade desportu maibe tasa komandanate Nino Konis Santana harame tiha Lautem durante fulan rua ne'e katak liu husi desportu ita kontinua heroi sira nia mehi

“Entaun ita tenki buka mekanismu oinsa atu tinan oin-mai tasa Nino Konis Santana ne’e bele sai eventu regular iha tinan-tinan ne’ebé hanesan tiha ona eventu munisipiu ninian” subliña Nelyo

Vice Prezidente Komisaun Organizadora, Delcio Guimaraens iha nia relatóriu hatete orsamentu ba atividade ne’e alende hetan husi SEJD $ 3,000 , komisaun organizadora mos hetan apoiu husi familia saudozu, loja Dilimart, W Four, Casa Agrikultura, Lucky Mrket no osan rejistu dolar 100 hosi klubu 31 ne’ebe partisipa iha jogu refere.

@COPYRIGHT2019#DNICT-SEJD#