DILI- Sekretáriu Estadu Juventude no Desportu (SEJD) Eng, Abrão Nokosiku Saldanha sorumutu hamutuk ho Comite Olympico Nasional Timor-Leste ( CONTL) no Confederação Desporto Timor-Leste (CDTL). Sorumutu ne’e hala’o Iha Kinta, loron-18 fulan-Fevereiru tinan-2021,iha sala reuniaun SEJD, Lecidere, Dili

Iha diskusaun ne’e excellensia sekretáriu estadu Abrão Saldanha hatete parte SEJD nia esperansa ida katak eventu internasionais rua ne’e ita nia atletas tenke tuir maibe presiza tau atensaun mos ba situasaun global pandemic Covid 19 ne’e, ho ida ne’e mak prezensa entre CONTL ho CDTL ne’e atu bele fahe informasaun ba malu atu nune’e bele hetan solusaun ida ne’ebé diak ba ita nia atletas sira hotu.

“Tinan ne’e iha eventu dimensaun internasionais rua mak, Olympic Games no Sea Games, jogu olimpiku sei hahu iha fulan jullo to’o agusto, Sea Games sei hahu iha fulan Novembro to’o dezembro 2021, entaun SEJD bolu CONTL no CDTL, atu deskute hamutuk,oinsa Timor-Leste nia partisipasaun ba eventu internasioanis ne’e, hodi nune’e tetu fila fali kona-ba jogu olympico tamba nasaun Timor tama ne’e laos prestasaun maibe ba ho konvite, ita mos hare ba kondisoes, tamba agora dadun ne’e nasaun Timor-Leste mos iha hela situasaun Covid 19 nia laran, ho nune’e Timor-leste partisipa ba Olimpico Games ne’e ka lae, ho ida ne’e mak presiza hatetene informasaun husi Japaun, nune’e mos atletas sira nia preparasaun ne’e oinsa, katak seidauk iha serteza, tamba ida ne’e dezisaun ne’ebe fora husi sekretaria estadu juventude no desportu nia kapasidade no nia kompetensia, tamba agora iha hela faze estadu emergensia nia laran, no informasaun ne’e tenke lori fali ba konselho ministro atu bele deskute,” dehan Abrão Nokosiku.

Governante ne’e hatutan, agora dadaun komite olimpiku internasional mos seidauk iha informasaun los kona-ba vasinasaun, aimoruk saida mak atletas bele uza, no ita nia atletas ba Japaun ne’e sei tama karantina ou lae. “ita nudar membro komite olimpiku internasionais, nasaun Tmor-Leste iha dever no partisipa, se ita mak la partisipa sei fo sansaun mai ita liu tinan 5 nia laran, tamba ita hetan fundus barak husi komite olimpiku, importante mak tenke partisipa atu nune’e labele hetan sansaun husi komite olimpiku internasional”. dehan sekretariu estadu ba jornalista sira.

Entretantu, Vice presidente CONTL Mateus Da Cruz hatete, komisaun organizadora agora hein hela dadus, liu-liu ba viagen nian nune’e mos ita nia kontijente nain hira mak atu partisipa. “agora dadun ne’e iha hela faze diskusaun nia laran inklui ba vasinasaun atletas sira no mos iha konsultasaun ba Anti Doping ba atletas sira”. dehan Mateus ba Jornalista sira.

Enkuantu, presidente CDTL Afranio Xavier hatete objetivu sorumutu ne’e mak halo primeiro aprezentasaun ba ita nia sekretáriu estadu kona-ba prepasaun eventu internasional ne’ebé mak sei realiza iha tinan 2021. Nudar Afranio husi sorumutu ne’e atu buka solusaun no deside hodi husu ba federasaun sira ne’ebé hola parte iha Sea Games Vietname iha fulan novembro, no jogus olimpiku iha Tokyo Japaun iha fulan jullo no agusto nia laran. Modalidade ne’ebé mak Timor-Leste sei partisipa iha Olympic games mak atletismo, taekwondo, no natasaun.

“Kona-ba jogus Sea games, SEJD hamutuk ho CDTL mak atu halo selesaun ba modalidade sira ne’ebé mak ita propoin atu ba, maibe seidauk definitivu, tuir orientasaun husi sekretáriu estadu sei hare fila fali ba modalidade ne’ebé mak fo prestasaun iha Sea Games ne’e,” konklui Afranio.

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2021