DILI - Sekretáriu Estado Juventude no Desportu (SEJD) fo premiu osan no sertifikadu apresiasaun ba atleta no treinador ho offisial sira ne’ebe foin lalais ne’e kontribui medalla iha jogos SEA Games 2019 iha Filipina.

Iha SEA Games 2019 Manila, Filipina Timor-Leste konsege hetan medalla neen (6) kompostu hosi medalla osan mutin (silver) ida no osan metan 5 ne’ebé offerese hosi atleta Taekwondo nain 4 no Boxing nain 2.

Atleta manan medalla osan mutin ne’e maka Ana da Costa da Silva Belo, hosi modalidade Taekwondo ne’ebé joga iha kategoria - 46 Kg.

Nain 5 seluk ne’ebe hetan osan metan maka Imbrolia de Araujo dos R. Amorin (Taekwondo, -54 Kg), Luisa dos Santos Rosa (Taekwondo, -49 Kg), Bonifasio da Silva Lobo (Taekwondo, -54 Kg), Jose Barreto Diaz Quintas da Silva (Boxing, -52 Kg) no Frederico Soares Sarmento (Boxing, 81 Kg).

Ba atleta ne’ebe hetan medalla osan mutin, SEJD liu hosi dezisaun Konsellu Nasional Desportu (KND) desidi fo premiu osan US$ 5,000.00 no sira ne’ebe manan medalla osan metan kada atleta simu osan US$ 3,000.00. Total osan hamutuk ne’ebe SEJD fo ba atleta nain 6 ne’e hamutuk US$ 20,000.00.

Aleinde atleta, SEJD mos fo premiu osan ba treinador no tekniku hosi modalidade rua ne’e hanesan ba Taekwondo nian ba ofisiais nain rua (Alexandrinho da Costa nu’udar tekniku no Awal Verdial nu’udar treinador) ho osan US$ 7,000.00.

enkuantu modalidade boxing nian Victor Ramos (treinador) ho Gil Dos Santos Isaac (tekniku) sira nain rua simu osan ho valor US$ 3,000.00.

Atribuisaun premiu no sertifikadu apresiasaun ne’e rasik entrega deretamente hosi Ministra Edukasaun, Juventude no Desportu, Dulce de Jesus Soares no Sekretariu Estadu Juventude no Desportu, Nelyo Isaac Sarmento, iha kampu basket SEJD, Sexta (27/12/2019).

“Kondisoes ne’ebe governu kria atu motiva ita nia atleta sira ne’ebe maka partisipa iha kualker festa desportu mundial ne’ebe reprezenta estadu, atu to ka la to’o, barak ka oituan, mudansa sempre akontese iha kualker tempu, maibe hare mak motivasaun intensaun oinsa maka enkoraja nia sidadaun liu-liu ba atletas sira atu halo prestasaun ne’ebe diak,” dehan Sekretariu Estadu iha nia deskursu.

Nune’e mos Imbrolia de Araujo dos Reis Amorin, reprezenta atleta sira ne’ebe simu premiu osan ne’e sente orgullu ho apresiasaun hosi estadu liu hosi SEJD.

.“Sente orgullu nu’udar atleta, no agradese ba governu,” komentariu Imbrolia.
Nune’e mos Ministra Dulce de Jesus Soares hateten, parte governu senti mos orgullu ho prestasaun atleta sira ne’ebe hamorin ona Timor-Leste iha jogu internasional.

Hakerek hosi: Frederico Branco de Jesus – Media Gabinete SEJD

@COPYRIGHT2019# MEDIAGABSEJD#DNICT-SEJD#