SEJD Apresia Inisiativa Juventude Suco Manleuana iha Area Desportu
Nelyo Isaac Sarmento apresia tebes ho inisiativa ne’ebé hatudu husi Juventude Suco Manleuana

By Admin 22 Julhu 2019, 00:54:11 TLs JUVENTUDE
SEJD Apresia Inisiativa Juventude Suco Manleuana iha Area Desportu

SEJD Apresia Inisiativa Juventude Suco Manleuana iha Área Desportu

DILI (09/06/2019) - Sekretáriu Estadu Juventude no Desportu (SEJD), Nelyo Isaac Sarmento apresia tebes ho inisiativa ne’ebé hatudu husi Juventude Suco Manleuana iha área desportu bainhira halo enserramentu ba jogu comunitaria iha Aldeia Lemokari, Suco Manleuana, Postu Administrativu Dom Aleixo, Munisipiu Dili, Domingo (09/06/2019). Sekretáriu Estadu apresia inisiativa ne’e tanba kontribui ba formasaun juventude sira liu husi área desportu, hodi fó biban ba foinsa’e sira ne’ebé subar hela talentu iha komunidade-nia leet atu hatuduan. “Ohin hau mai hare iha ne’e inisiativa diak teb-tebes husi joven sira, inisiativa ne’ebe ita lakon iha tempu naruk, tempu barak tebe-tebes ita lakon tiha, tamba ita ne’e forte nasaun ne’e forte tamba ita mai ho sentimentu ida katak ita tenke unido mak ita bele forte, maibe ita ida-idak maka lakohi tau interese ba ita nia ambiente rasik mak ita sei la forte entau inisiativa ne’ebe mak ohin grupo joven sira halo ne’e faz parte husi atu lori ita ba lembra hikas fali katak ita unido mak ita bele solusiona problemas hot-hotu ne’ebe mosu iha ita nia bairo “,dehan Nelyo Isaac. Nudar Nelyo Isaac inisiativa ne’ebe maka joven sira halo ho apoiu husi governu, la barak maibe pelumenos bele enkorja atu jovens sira sente katak moris iha ambiente ida presiza dever no respeita organiza malu ho diak liu tan atu nune’e bele hametin unidade. Iha diskursu ba foinsae sira iha kampu Manleuana Sekretáriu Estadu Juventude no Desportu enkoraza atu joven sira sai joven ne’ebe inovativu no kreativu, joven ne’ebe hakarak kontribui ba dezemvolve ita nia nasaun, tamba inisiativa ida husi joven sira halo ne’e importante. “Hau ohin kontente los hare imi nia kampu ne’e, kontente tamba hau hanoin katak iha uma le’et sira hanesan ne’e rai luan hanesan ne’e laiha, afinal iha, entaun ohin imi hatudu ba hau dehan katak ita sei iha rai ne’ebe luan atu kria fasilidades ne’ebe oin-oin ba fatin ida ne’e, iha Manleuana, sorti tebe-tebes, Manleuana iha fatin rua, ida uluk imi sei lembra, kampu ida Real Madrid ne’e agora laiha tiha ona, kampo Real Madrid ne’e responsabilidade Sekretaria Estado Juventude no Desportu ida atual ne’e no grupos ne’ebe ita funda bolu naran FESDERATIL( Fundasaun Escolar Desportiva Timor Leste) iha fatin ne’eba maibe governu mak apoiu duni ba grupo joven ida mak organiza hela fatin ne’e”, katak Nelyo Isaac. Entretantu , Xefe Suku Manleuana Jacob Tilman Soares mos kongratula inisiativu nebe halo husi joven sira iha Aldeia Lemokari atu hatudu ba Bairro seluk katak foinsae sira mos bele organiza iventu ruma iha bairo ho responsabilidade. “Hau fo parabens ba jovens sira ne’ebe iha inisiativa rasik no kapas hodi hatudu ba bairro seluk katak ita mos bele hatudu buat ruma ho eventu ne’e mak hatudu katak iha responsabilidade, esperansa, no paz hakmatek, iha programa ne’e iha tiha ona klaran tamba 20 de maio liu tiha ona, hatudu katak ita mos bele halo buat ruma, ba ita nia dezemvolvimentu iha ita nia bairo, iha suku Manleuana, hau sempre husu mos ba sua exelencia Sekretario Estado Juventude no Desportu bele tinan oin mai fo apoiu diak liu tan ba eventus sira hanesan ne’e, tamba ami suku foun, nunka hetan programa ruma”, katak Jacob.Nudar Jacob , nia parte haruka karta ba sua excia nia fatin tarde liu, tamba ne’e mak programa tarde, maibe nudar povu nia liman ain kontinua hodi husu ba SE hodi hadia joven sira nia futuru iha bairobairo no sukus. “husu mos ba komunidade iha ne’e katak ita iha kampu tolu (3) ona, ba futuru mak atu prepara hodi hadia kampu ne’e, para ita hotu fo liman ba malu, fo proposta ba governu bele apoiu ita nia kampo ne’e, atu ne’e bele fo treinamentu ba voleibol, basquetebol, futebol no ikus mak futsal “

hatutan Jacob Soares. Enkuantu, Xefe Aldéia Lemokari Estaquio Tilman hateten, nia parte apresia ho kriasaun kampu nee atu bele anima komunidade sira. “Kampo ida ne’e juventude rasik mak kria ho inisiativa rasik liu husi sira nia kolaborasaun ne’ebe sira aruma malu, oinsa atu bele kria eventu ruma iha aldeia Lemokari suku Manleuana nian, tamba ida ne’e mak hanesan autoridade suku ida ne’e, membro konsellu do suku tomak ami apresia ho ita boot sira hanesan juvetude maibe tau atensaun nafatin, oinsa atu bele anima ita nia komunidades sira, tamba ida ne’e mak ami senti orgullu teb-tebes ba juventude sira ne’ebe ke iha hanoin diak oinsa atu bele atu organiza malu hakribi violensia iha tema ita bolu no sira foti katak lae ba violensia ida ne’e”, dehan Estaquio. Autoridade lokal nee mos agradese tebe-tebes ho juventude sira nia inisiativa ne’e, no hetan fundus husi SEJD hamutuk U$ 1,500.00 inklui apoiu husi kompania balun iha suku laran”. Iha partisipasaun ne’e hetan seguransa masimu husi membro OPS, membro KPK no mos autoridades local no xefe juventude rasik husi Suku Manleuana Aldeia Lemokari. Aktividade desportu komunitaria ne’ebe halao iha suku Manleuana mak hanesan; Dada tali feto no mane, Halai karon, Tata krupuk no sae bua.




Video Ligasaun:


Hakerek Komentariu Iha Facebook

Hakerek Komentariu Iha Account Facebook

Hare Komentariu Hotu-Hotu

Hakerek Komentariu