S.E Abrao Saldanha Hasoru Malu ho Foin-Sae Millennial Julito Miguel

By Media DNICT 11 Desembru 2020, 13:07:40 TLs JUVENTUDE
S.E Abrao Saldanha Hasoru Malu ho Foin-Sae Millennial Julito Miguel

Sekretáriu Estadu juventude no Desportu Eng, Abrão Nokosiku Saldanha foto hamutuk Julito Miguel , foin-sa’e millennial ida nudar mós estudante Eskola Sekundaria 4 de Setembru Viqueque (28/11/2020). Imajen / DNICT


VIQUEQUE- Sekretáriu Estadu juventude no Desportu Eng, Abrão Nokosiku Saldanha hasoru malu ho foin-sa’e millennial ida iha viqueque, Julito Miguel, estudante Eskola Sekundaria 4 de Setembru Viqueque. Hasoru malu ida ne’e akontese wainhira Sekretariu Estadu hala’o vizita ba Centru Juventude Viqueque, iha Viqueque vila hafoin seremonia icár bandeira Loron Proklamasaun Independensia RDTL iha munisipiu Viqueque.

Julito Miguel foin-sa’e ida ne’ebé iha kreatividade no konsege kria aviaun kiik ida ne’ebé bele semo no kontrola ho remote control. Alem de aviaun kiik ne’e, Julito mós bele halo mâkina oioin hanesan mákina dulas Nu’u, mákina behu batar, mákina ba dulas kafe, mákina ba ko’a kripik husi fehuk europa, senora, talas, aifarina ka hudi.

Iha tinan-2018, Julito Miguel konsege halo modelu elikóptru ida ne’ebé mak bele semo, ne’ebé nia aprezenta ka halo demonstrasaun iha iha loron mundial siensia no matematika tinan-2018, ne’ebé hala’o iha postu administrativu venilale, munisipiu Baucau.

Hatan ba pergunta husi Sekretariu Estadu Juventude no Desportu kona-ba ninia mehi pesoal, Julito Miguel hatete, “ha’u nia mehi mak hakarak atu sai sientista no pilotu.” Sekretariu Estadu enkoraja Julito atu labele husik ninia mehi maske hasoru dezafiu oinoin, no sei buka dalan oinsa mak Julito bele hetan tulun atu atinji ninia mehi.

Julito Miguel, hela iha Naeboruk, Viqueque no fa’an es ho dosi lorloron hodi sustenta ninia eskola tamba inan-aman laiha kbiit natón.

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2020




Hare Komentariu Hotu-Hotu

Hakerek Komentariu