S.E Abrao Saldanha Hasoru Malu ho Country Director Peace Corps iha Timor-Leste

By Media DNICT 27 Agostu 2020, 08:53:57 TLs JUVENTUDE
S.E Abrao Saldanha Hasoru Malu ho Country Director Peace Corps iha Timor-Leste

Foto hamutuk Sekretáriu Estadu Juventude no Desportu Abrão Saldanha ho Country Director Peace Corps Iha Timor-Leste. Imajen // DNICT


DILI- Sekretáriu Estadu Juventude no Desportu, Sua Excellensia Eng. Abrão Saldanha hasoru malu ho Country Director Peace Corps nian iha Timor-Leste, Sra. Kavita Pullapilly iha salaun enkontru SEJD, Lecidere, Dili, loron-26 Agostu 2020. Reuniaun ida ne’e koalia kona-ba parseria ne’ebé existi hela entre SEJD ho Peace Corps no oinsa atu hadiak liu tan serbisu parseria ba oin.

Durante sorumutu, Sra. Pullapilly atualiza Sr. Sekretariu Estadu kona-ba serbisu sira ne’ebé mak durante ne’e voluntariu sira Peace Corps nian hala’o ona ho komunidade, liuliu serbisu sira ne’ebé mak sira halo ho juventude sira. Programa sira ne’ebé mak Peace corps hala’o ho komunidade sira mak hanesan; oinsa atu hala’o atividade ba hasa’e rendimentu, jestaun ba osan, prepara ema atu tama empregu, dezenvolvimentu no fortalesimentu organizasional no mós formasaun lingua Ingles.

Sekretariu Estadu esplika ba Sra. Pullapilly katak SEJD nia prioridade ida mak oinsa atu maximiza centru juventude no organizasaun sira iha munisipiu atu presta serbisu diak liu tan ba joven sira iha baze. Sekretariu Estadu fo orientasaun ba hala’o diskusaun tékniku atu hare oinsa mak programa peace corps nian sira bele ajuda hadiak liu tan prestasaun serbisu ba joven sira iha centru juventude sira.

Sekretariu Estadu Juventude no Desportu hakarak atu apoiu sira iha centru juventude foka ba oinsa mak estimula joven sira hola parte iha seitor produtivu sira.

Akompaña Sekretariu Estadu iha sorumutu ne’e mak Diretor Jeral Juventude no Desportu, David Tomas de Deus, Asesor Ezekutivu, Parseria no Komunikasaun, Edio José Maria Guterres no Asesor Tékniku no Jurídiku Nelson Silva. Entretantu, Sra. Pullapilly, mai ho ninia Jestor Programa, Celio Alves.

#FoinSaeMillennialForsaKriativa #DesportuIhaSosiedadenoPrestasaun

@copyrigth DNICT-SEJD 2020




Hare Komentariu Hotu-Hotu

Hakerek Komentariu