VIQUEQUE- Sekretáriu Estadu Juventude no Desportu Eng. Abrão Nokosiku Saldanha vizita centru juventude Viqueque, hafoin sai inspetor ba seremonia icár bandeira Loron Proklamasaun Independensia Repúblika Demokrátika Timor-Leste (RDTL) iha munisipiu Viqueque. Vizita ida ne’e Sekretariu Estadu hala’o iha loron-28 fulan-Novembru ho intensaun atu hatene diak liu tan programa, atividade no dezafiu sira ne’ebé centru juventude Viqueque hasoru lorloron.

Sekreariu Estadu hatete vizita centru juventude viqueque tamba centru juventude hanesan SEJD nia parseiru ida ba implementasaun programa no aktividade sira, no tamba ne’e mak aproveita mai icár bandeira iha munisipiu Viqueque, mai vizita hodi hare kedas sira nia aktividade no servisu ne’ebe centru halo no rona kedas esplikasaun husi jestor centru nian no buka hatene informasaun kona-ba centru nia lalaok.

“Hare ba centru viqueque nia kondisaun diak, fasilidade mós diak. Guvernu, liu husi SEJD, sei prioritiza ba maximizasaun atu garante katak centru ida ne’e la’os iha fatin deit, maibé mós centru ida ho programa barak nune’e bele hala’o aktividade halo barak, atu fo kobertura barak liu tan ba joven sira no fo fatin ba joven sira atu bele expresa sira nia talentu no kapasidade,” Sekretariu Estadu hatutan.

Centru juventude Viqueque fó formasaun ba joven sira liu husi edukasaun naun formal sira hanesan; kursu lian Ingles basika, komputador, no mós formasaun kona-ba Kompetensia ba vida ka Life Skills-Based Education (LSBE).

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2020