DILI- Sekretáriu Estadu Juventude no Desportu, Eng. Abrão Nokosiku Saldanha halo abertura ba kompetisaun semana juventude ba ema ho defisiensia. Eventu ida ne’e hala’o hodi komemora loron massacre santa cruz 12 Novembro no mós selebrasaun Loron proklamasaun Independensia 28 Novembru. Abertura ne’e hala’o iha iha kampu basketból Dom Bosco Comoro, iha loron-24 fulan-Novembru tinan-2020.

Iha diskursu, Sekretáriu Estadu Juventude no Desportu hatete “maske okupadu hela ho preparasaun ba debate OJE 2021, maibé ha’u deside tenke partisipa ba aktividade ida ne’e ne’ebé ha’u nia maluk joven sira ho defisiensia organiza no hala’o.”

Sekretariu Estadu hatutan, haksolok tebtebes ho eventu ne’e, tamba ne’e haforte ninia fiar pesoal katak saida mak maluk joven ho defisiensia sira presiza mak rekoñesimentu no la’os atu fo kuitadu ba sira. “Ha’u deside hodi partisipa tamba ha’u nia fiar no konsiensia rasik katak ema ho defisiensia ne’e la presiza ita nia kuitadu, katak sira presiza deit mak ita nia rekoñesimentu ba sira nia pontesia,” hodi esplika liu tan katak realizasaun eventu ida ne’e hatudu maluk sira ho defisiensia nia potensia no kapasidade.

“Ha’u nia prezensa iha ne’e ohin, forma ida atu rekoñese ema ho defisiensia ninia kapasidade no importansia husi sira nia integrasaun iha ita nia sosiedade atu halo ita nia sosiedade inkluzivu liu tan,” Sekretariu Estadu hatete.

“Maluk sira ho defisiensia hatudu tiha ona sira nia pontensia liu husi modalidade desportiva nian, hanesan prestasaun ne’ebé mak atleta Teófilo Freitas halo hodi hamorin Timor-Leste nia naran iha rai liur, liu husi fera rekor Asiátiku iha modalidade atletismu iha Asia Paral Games,” Sekretariu Estadu esplika.

Sekretariu Estadu Juventude no Desportu louva inisiativa ida ne’e no hein katak eventu ida ne’e sei kontribui ba hamosu atleta diak sira ne’ebé bele ba hamorin Timor-Leste nia naran iha eventu desportivu rejional no internasional sira.

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2020