DILI (12 Novembru 2019) – Pintor Novelio Francisco de Sousa Lay iha kompetisaun Pintura 2019 ne’ebe organiza hosi Diresaun Nasional Arte Juvenil SEJD sai kampiaun hodi halakon pintor nain 65 seluk.

Tuir rejistrasaun, komisaun organizadora simu pintor nai 85, maibe iha loron kompetisaun prezensa deit ema nain 66, inklui pintor feto nain 13.

Iha fatin segundu hadau hosi pintor ho naran Alfonso Nacher Freitas da Silva, Zeferino da Costa Miranda (3), Nerio Albino de Jesus Borges (4), Mane Taharoman S. De Andrade (5), no pintor feto ho nara Aquelina de Jesus Araujo Santos hetan fatin da-nen.

Premiu ne’ebe manan nain sira hetan alende taça ba fatin dahuluk to’o terseiru, manan nain sira mos simu sertifikadu apresiasaun no osan ho montante US$ 500 ba fatin dahuluk, US$ 400 (2), US$ 300 (3), US$ 250 (4), US$ 200 (5), US$ 150 (6).

“Hau kontenti bele sai manan nain iha kompetisaun ne’e,” komentariu Novelio hafoin simu premiu.

Nia mos husu ba SEJD atu kontinua kompetisaun ne’e iha tinan oin, nune’e bele fasilita foinsa’e sira nia talent iha pintura nian.

“Hau orgullu nudar feto, no husu ba maluk feto sira atu hatudu talentu ne’ebe iha hodi labele subar iha uma deit,” komentariu Aquilina de Jesus Araujo Santos ne’ebe manan fatin ba da-nen.

@COPYIGHT2019#MEDIAGABSEJD#