KRAM ho JU,S Kontinua Konsulta Publika ho Lideransa Komunitaria sira

By Admin 11 Julhu 2021, 18:54:14 TLs CRAM
KRAM ho JU,S Kontinua Konsulta Publika ho Lideransa Komunitaria sira

DILI – Komisaun Reguladora Arte Marsiais (KRAM) ne’ebé hamriik iha Sekretaria Estadu Juventude no Desportu (SEJD) nia okos, hamutuk ho Firma Jurídiku JU,S Advokasia kontinua halo konsulta públika ho lideransa komunitária sira kona-ba pakote lejislasaun arte marsiais. Konsulta públiku ne’e hala’o iha Salaun Luz Clarita, Dili, Sesta loron-9 fulan-Jullu tinan-2021.

Tuir Prezidente KRAM, Octavio da Conceição, konsulta publiku ne’e importante tebes atu publiku intende katak atividade arte marsiais ne’e laos kriminozu, maibe oinsa atu regula sai hanesan desportu ida. Nune’e mós ba firma ne’ebé serbiau hamusuk ho Governu atu elabora pakote lejislasaun ne’e bele rona autoridade lokal sira nia opiniaun kona-ba asuntu ida ne’e.

Otavio da Conceição esplika katak “atividade (konsulta) ida ne’e atu rona liu lideransa komunitaria sira nia hanoin kona-ba oinsa Governu bele hamosu lei sira ne’ebé maka nesesariu ba atividade arte marsiais sira iha nivel suku, nune’e bele lori joven sira ne’ebé pratika arte marsiais ba dezemvolvimentu arte marsiais nian.”

“Entaun presiza halo lejislasaun ida atu regula sira hodi bele kontribui ba dezemvolvimentu desportiva nian. Kontinuasaun husi konsulta publika ne’ebé mak. Governu hala’o ona ho intensaun atu hakerek pakote lejislasaun atividade arte marsiais nian,” Prezidente KRAM ne’e hatutan.

Tuir planu, JU,S, forma jurídiku ne’ebé  mak SEJD fo fiar hodi hala’o prosesu elaborasaun pakote lejislasaun arte marsial nian, sei bele ona finaliza esbosu iha fulan outubro tinan ne’e. Serbisu ida ne’e sei hamosu lei haat ne’ebé konstitui pakote lesjislasaun arte marsial ne’ebé mak sei regula atividade arte marsiais sira nian iha Timor-Leste.

Konsulta públiku ida ne’e hala’o hanesan parte ida husi prosesu ne’ebé mak bele fasilita JU,S atu rekolla parte relevante sira hotu nia hanoin kona-ba oinsa atu regula arte marsial iha Timor-Leste, inklui oinsa atu halo alterasaun ba lei numeru 5/2017, lei no regulamentu propriu sira kona-ba kurikulum, treinamentu, sertifikasaun, no formasaun arte marsial.

“Publiku kestiona katak lei sira ne’ebé Governu halo sein konsulta publiku, entaun VIII Governu Konstitusional, ho baze ba rezolusaun numeru 4/2020 kona-ba reativasaun organizasaun arte marsiais ne’ebé governu taka liu husi rezolusaun numeru 13/2016, hala’o konsulta públiku sira atu hamosu pakote lejislasaun ba arte marsial,” Prezidente KRAM hatete.

Entretantu Xefe Suku Mascarenhas, Rui Elidio de Jesus apresia governu, liuliu SEJD ba hola inisiativa hodi rona entidade sira hotu nia hanoin, liuliu lideransa komunitaria sira nia hanoin kona-ba oinsa mak lei sira ne’ebé governu atu hamosu bele regula arte marsial sira ho diak.

“Iha suku ne’e ami koalia aldeia to’o nivel nasional. Iha partisipasaun ne’e mos ami mai rona konsultasaun, oinsa maka Kompañia JU,S Advokasia ne’e fo hanoin ba xefe suku sira no xefe suku mos fo hanoin fali ba kompañia bele hare asuntu sira ne’e hotu. Atu haree ba estabilidade iha suku ne’e mai husi kompetensia xefe suku no xefe aldeia sira, tanba sei servisu hamutuk ho Operasun Polisiamentu Suku (OPS) iha ne’eba, nune’e ami lideransa suku mos bazeia ba ida ne’e,” nia hateten.

Atividade konsulta públiku ida ne’e parte importante ida husi serbisu ne’ebé SEJD hala’o atu implementa VIII Governu Konstitusional nia programa no SEJD nia polítika ba reintegrasaun arte marsial iha sosiedade no sira nia enkuadramentu iha Timor-Leste nia sistema nasional desportu.

Atividade konsulta publiku ne’e mós hetan patisipasaun husi ONG Belun, ONG Fundasaun Mahein, Estudante Universitariu, Reprezentante Inan-Aman, Nai Xefe Suku, Xefe Aldeia sira. (*)     

 

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2021




Hare Komentariu Hotu-Hotu

Hakerek Komentariu