KRAM Halo Dialogo Nakloke ho Komunidade no Joventude iha Suku Kuluhun

By Media DNICT 02 Setembru 2020, 15:24:24 TLs CRAM
KRAM Halo Dialogo Nakloke ho Komunidade no Joventude iha Suku Kuluhun

Presidente KRAM desimina rezulusaun guvernu no 4/2020 iha Suku Kuluhun. Imajen/DNICT


DILI - Komisaun Reguladora Arte Marsiais (KRAM) sosializa Rezolusaun no 4/2020 iha Suku Kuluhun, Postu Administrativo Cristo Rei, Munisipiu Dili, kuarta 02 setembru 2020.

Atividade ne’e nudar kontinuasaun programa KRAM nian hodi disemina informasaun kona-ba rezolusaun Guverno no 4/2020 , marsu ne’ebé revoga tiha ona rezolusaun guvernu no 16/2013, 10 jullu kona-ba bandu grupu arte-marsiál hanesan PSHT, KORK & KERA SAKTI.

Alende KRAM, CNJTL ho PNTL mós hola parte hodi fahe informasaun ba foin-sa’e sira tuir papel instituisaun ida-idak nian relasiona ho aktu joven balun ne’ebé uza fali organizasaun arte marsiais hodi buka asalta malu no krime sempre sae hela deit iha Teritoriu Timor Leste.

Presidente KRAM interinu Octavio da Conceição hatete Rezolusaun Guverno no 4/2020 ne’e fo dalan atu re-atualiza organizasaun arte marsiais sira. Diploma legál ne'e rasik instrui mós Polisia Nasionál Timor-Leste (PNTL) atu intensifika asaun kombate krime kona-ba prátika ilísitu husi arte-marsiál no rituál sira.

“Lei ne’e iha kapitlu neen (6) ne’ebé husi kapitulu neen ne’e autoriza mós atu uza forsa kuandu pratika arte marsial kria konflitu bebeik iha Teritoriu Timor laran tomak la tuir dalan autoridade PNTL sei atua ikus liu ho forsa,” esplika Octavio.

Enkuantu, Presidente Konsellu Nasional Juventude Timor-Leste (CNJTL, sigla Portugés) Maria Dadi Magno hatete Juventude mak pilar importante ba futuru maibe joven nia problema barak tamba kauza oi-oin nune’e estadu liu husi CNJTL sai base fundamentu atu komunga papel juventude nian hodi konsolida unidade nasional. Nudar Maria Dadi, Estadu ho nia kbit tomak promove no fo apoiu ba joven sira liu husi edukasaun, formasaun no kultura.

Dadi Magno esplika Durante independensia joven sira loloos ne’e sai fontes ba dezemvolvimentu, ne’e sai pontu refelesaun ida tamba problema arte marsiais no stigma joven hanesan joventuda laos joven dezemvolve tamba joven sira la distinge nia inimigu loloos maibe tau fali inimigu hanesan diferensia ideolojia, koor, hanoin no dutrina.

“Ida ne’e mak ita sala tamba ita nia inimigu ne’e mak luta hasoru injustisa, kiak no korupsaun. Dutrina arte marsial no ritual mós la hanorin ema ida atu ba halo violensia. Estado iha papel moral atu responsabiliza , no liu husi KRAM atu regulariza ho lei atu arte marsiais sai hanesan organizasaun ida ne’ebé iha nia lejitimasaun hanesan organizasaun atu haburas talentu no prestasaun,” dehan Maria Dadi Magno.

Partisipa iha diálogo nakloke ho komunidade ne’e mai husi representante arte marsial, juventude no autoridade lokal suku Kuluhun.

Diálogu ho motto “ Halo buat ne’ebé diak laos fasil maibe tenki halao bebeik” realiza tiha ona iha loron 29 fulan jullu 2020 iha Suku Hera no sei remata iha loron 16 fulan setembru 2020 iha Suku Becora.

#Foin Sae Millenial Forsa Kriativa #Desportu Iha Sosiedadeno Prestasaun

PS//RM

@copyrigth DNICT-SEJD 2020




Hare Komentariu Hotu-Hotu

Hakerek Komentariu