MALIANA- Ekipa basketeból husi Kefa TTU okupa terseira lugar jogu fronteira datoluk iha municipio Maliana Tersa ne’e (19/11).

Jogo ne’ebé halao husi 15-19 Novembro 2019 ne’e remata ho ekipa basket Kefa mak sai vensedor ba treseiru lugar iha jogu finál hasoru ekipa basketeból Belu Atambua ho skore 65-59.

Kapitaun basketeból Kefa Fransisco da Cammra de Monte hateten sente kontente tamba nia ekipa konsege tama finál hodi hadau-malu fatin ba manan na’in datoluk no dahat, no realidade Kefa okupa fatin datoluk iha jogu amizade fronteira tinan ida ne’e.

Nudar, Fransisco da Cammra nia parte apresia jogu durante semana-ida ne’ebé la’o ho diak teb-tebes tamba iha kooperasaun di’ak entre Timor Leste ho Indonézia liu-liu bele kria lasu amizade entre rai-rua ne’ebé iha liña fronteira.

“ Ba futuru tuir informasaun Belu Atambua mak sei sai uma-nain tinan oin no ami sei esforsu makas hodi akupa fatin dahuluk ka vensedor. Husu hanesan desportivo tenki semangat treino atu nune'e iha kompetisaun tuir mai ba sira ne’ebé lakon sei hetan fila fali vitoria iha torneio tinan oin.” dehan Fransisco.

Hakerek na’in : Abel de J.A

@COPYRIGHT2019#DNICT-SEJD#