MALIANA- Ekipa tebe-bola Maliana A sai manan-nain iha final jogu fronteira 2019 ne’ebé realiza iha estadion Malibaka Yamato Maliana, Munisipiu Bobonaro kinta (21/11). Ekipa Maliana A manan ekipa Timor Tengah Utara (TTU) ho golu 1-0

Jogu final iha tuku hat lorokraik ne’e parte rua esforsu total atu sai ekipa ne’ebé kualidade liu, mesmu nune’e sorte apoiu liu uma nain Maliana A hodi hatama uluk golu iha minutu 30 husi jogador Joanico.

Jogador ho númeru kamizola 19 ne’e hatama golu ne’ebé pasa-husi kapitaun ekipa Sequito hafoin bola konsege liu husi defeza ekipa Kefa TTU.

Iha parte daruak hafoin intervalu, jogu ne’ebé lidera husi arbitu Nivio no laña Filomeno no Antonio ne’e la halo mudansa ne’ebé signifikante. Ekipa rua kontinua esforsu atu bele marka tan golu maibe la konsege hetan rezultadu tamba parte rua nia defeza metin. Úniku golu husi jogador Joanico lori vitoria ba ekipa Maliana A.

Kompetisaun futeból jogu fronteira ne’e partisipa ekipa nen (6) mak hanesan Maliana A, Suai-Covalima, Maliana B, RAEOA, Belu-Atambua no Kefa -TTU

Nelson de Oliveira Freitas kapitaun Ekipa TTU nian hatete nia parte simu rezultadu tamba esforsu tomak halo maibe la konsege ultrapasa sai kampiaun. Enkuantu, Treinador ekipa TTU Tonny Batta hateten simu rezultadu ne'ebe iha.

“ Tanba ami nia preparasaun atu mai joga tempu badak los iha semana rua nia laran deit nomos ami nia jogador di’ak balun lamai ho razaun sira la hetan autorizasaun husi eskola, maibe ami sente haksolok sai segundu lugar iha jogu fornteira ba datoluk tinan 2019 ne’e,” dehan Tonny.

Entretantu, kapitau Maliana A, Siquito espresa nia sentimentu kontente tamba rezultadu treinu durante ne’e lori duni vitoria ba ninia ekipa.

Jogu fronteira ne’e hala’o atu hametin relasaun di’ak entre munisipiu ne’ebé besik fronteira hanesan Bobonaro,Covalima no Rejiaun Administrativ Espesiál Oé-Cusse Ambeno (RAEOA). Enkuantu, hosi Indonézia nian mak hanesan Atambua, Malaka no Kefa.

Hakerek na’in : Juvenal de A

@COPYRIGHT2019#DNICT-SEJD#