Henrique Sai Jogador Diak Liu Iha Taxa Hassanal Bolkiah

Jogador Team Nasional Henrique Wilson husi sub-21 hetan predikat sai jogador diak liu no simu taxa iha kompetisaun taxa Hassanal Bolkiah ne’ebe hala’o iha Brunei Darussalam foin lalais ne’e.

Durante iha kompetisaun taxa Hassanal Bolkiah, Wilson hatama golu rua (iha semi final no final) ne’ebe lori nia no Timor-Leste sai primeiru lugar iha kompetisaun ne’e.
“Hau rasik la espera atu hetan sai jogador diak liu iha taxa Hassanal Bolkiah ne’e, e hau kontente ho ida ne’e no ho esforsu tomak ne’ebe hau halo durante kompetisaun,” nia hateten, iha sede FFTL, Dili.
Jogador husi Klubu Boavista ne’e hatama gol ba dala rua nian bainhira sira nia team hasoru malu ho team husi nasaun Cambodia iha taxa Hassanal Bolkiah.
“Hau orgulho teb-tebes tanba lori no hamorin ona Timor nia naran iha mundu internasional liu husi jogu futebol ne’e,” nia orgulho.
Ba ne’e oin, nia promote sei esforsu aan nafatin treinu atu nune’e bele hadia diak liu tan no sai treinadu liu tan hodi prepara aan ba eventu sira tuir mai.
Iha parte seluk Sekretario Estado Promosaun ba Alto Kompetisaun (SEPAK), Osorio Florindo hateten la fasil atu sai primeiru lugar iha kompetisaun ida, maibe importante mak presiza iha preparasaun ne’ebe diak.
“Maibe hau orgulho tanba ita nia jogador sub-21 sira bele sai primeiru lugar iha kompetisaun ne’e e ita nia jogador ida mos sai jogador primeiru melhor, nia simu piala ida,” nia orgulho.
Nia hateten, molok jogador sira ne’e ba tuir kompetisaun ruma iha rai liur, Federasaun Futebol kria liga entre klubu sira iha rai laran no liu husi ida ne’e federasaun hili jogador sira ne’ebe joga diak hodi reprezenta Team Nasional iha liur.
“Jogadores Timor-Leste sub-21 marka ona istoria foun, foti ona taxa Hassanal Bolkiah no pemain terbaik, istoria Timor hahu hakerek ona agora ba oin kona ba taxa Timor,” nia hateten.
Iha fatin seluk joventude Jose Pinto sente kontente tanba jogador Timor-Leste nian hatudu ona ba mundu tomak, katak jogadores timoroan bele tanba bele foti ona piala rua.
“Ne’e la’os buat fasil ida, sira esforsu aan mak bele hetan piala ida ne’e,” nia hateten.
Nia mos, husu ba governu foun mai atu tau atensaun no fo prioridade ba jogador sira ne’ebe hatudu ona sira nia talent hodi manan no simu taxa, ne’e orgulho bo’ot ida ba nasaun Timor-Leste.
“Presiza kria fatin ne’ebe mak seguru, hanesan akademia para ita nia jogador sira bele treinu ho diak liu tan,” nia sujere.