Guverno fo fiar ba organizasaun juventude organiza celebarasaun loron 12 Novembro

By Media DNICT 06 Novembru 2019, 12:47:34 TLs JUVENTUDE
Guverno fo fiar ba organizasaun juventude organiza celebarasaun loron 12 Novembro

Fotografia : Komisaun Organizadora komemorasaun loron Masakre Santa Cruz no Loron Nasional Juventude Zaulino Gomes da Silva hato hela atividade komemorasaun 12 Novembro


DILI- Guverno liu husi Secretaria Estado Juventude no Desportu (SEJD) fo fiar ba joven sira iha organizasaun juventude nebe durante ne’e hanesan parseiru ho guverno iha level nasional hodi organiza selebrasaun loron 12 Novembro tinan ne’e.

Atividade komemorasaun ne’e fahe ba Komisaun rua (2) maka hanesan Komisaun ba komemorasaun loron Nasional Juventude no Masakre Santa Cruz iha Dili no municipiu nomos komisaun organizadora ba iventu celebrasaun loron Masakre Santa Crus 12 Novembro.

Presidente Komisaun Organizadora Zaulino Gomes da Silva hateten Alumni Parlamentu Foinsa’e (APFTL) mak nudar responsavel ba eventu boot rua nebe refere.

“Alumni Parlamentu foinsae nudar responsabel para atu hare ba eventu boot rua ne’e inklui ho UNETL. Nune’e mos centro Juventude Becora no Centru Juventude Comoro ho CVTL no parte Komisaun nee hotu nomos centru juventude sira iha Municipiu 12 no RAEOA,” dehan Zaulino Gomes.

Nudar Zaulino, festeiza komemorasaun loron importante ba juventude 12 Novembro ne’e, actividade sei hahu iha loron 8 no remata iha loron 12 Novembro kalan ho actividade oi-oin. Iha nivel nasional, sei hahu ho talkshow TV, Konsulta massal espesial ba maluk sobrevivente Massacre Santa Cruz , kompetisaun pintura nomos konsertu musika nebe fahe ba fatin tolu hanesan SEJD Dili , Centru Juventude Becora no Centru Juventude Comoro. Enkuantu atividade Iha nivel municipiu hahu iha loron 6-12 Novembro.

“Iha actividade oi-oin nebe temi ona iha mos atividade doasaun ran nudar jestu solidariedade, sei iha mos jogu amizade husi jerasaun 12 Novembro ho joven jerasaun foun , limpeza jeral iha Mercado Manleuana no mercado Taibessi nebe sei mobiliza estudante sira hotu. Sei iha mos seminariu nasional nebe sei partisipa husi joven 500 ho ninia representante municipiu nain 10 ho orador prinsipal konaba assuntu dezemvolvimentu juventude iha Timor Leste no sa mak juventude sira hakarak atu rekomenda ba guverno. Jogu amizade sei halo iha nivel municipiu inklui missa no divertimentu. Reflesaun sei halao iha 11 Novembro kalan no missa iha 12 Novembro. Ho oportunidade ne’e husu partisipasaun maximu husi publiku liu-liu joven sira atu partisipa atividade importante nebe refere,” hatutan Alumni Parlamentu Foinsae ne’e iha konferensia ba imprenssa nebe halao iha SEJD Tersa Feira (05/11) ne’e.

@COPYRIGHT2019#DNCIT-SEJD#




Hakerek Komentariu Iha Facebook

Hakerek Komentariu Iha Account Facebook

Hare Komentariu Hotu-Hotu

Hakerek Komentariu