DILI- Sekretariu Estadu Juventude no Desportu, Eng. Abrão Nokosiku Saldanha Iha loron-25 fulan-Agostu tinan-2020 ne’e hala’o reuniaun regular ida ho Presidente Federasaun Futeból Timor-Leste (FFTL). Iha reuniaun, Prezidente FFTL hato’o FFTL nia planu estratéjiku tinan 2020 to’o 2023 ba Sekretariu Estadu. Reuniaun mós halo diskusaun kona-ba oinsa atu hadiak liu tan SEJD ho FFTL nia servisu hamutuk ba oin.

Sekretariu Estadu apresia FFTL ba hala’o ona Kopa FFTL maske sei hasoru difikuldade oioin no husu liuliu atu kontinua nafatin liga juvenil ne’ebé FFTL realiza ona iha munisipiu sira. Sekretariu Estadu mós expressa ninia esperansa katak liga hirak ne’e sei hamosu jogador futeból Timor oan sira ne’ebé diak ba futuru.

Entretantu, prezidente FFTL, Sr. Francisco Jerónimo hatete alem de aprezenta planu serbisu, FFTL mós relata atividade hirak ne’ebé sira realiza tiha ona, progresu no dezafiu sira no atinjimentu hirak ne’ebé sira planeia atu hetan iha tinan sira tuir mai.

SEJD ho FFTL mós koalia kona-ba kestaun infrastruturas desportivu hanesan kampu sira no estádiun sira atu prienxe padraun internasional hodi bele fasilita jogus internasional no nasional sira.

FFTL hahu tiha ona liga futeból feto, hahu mós ona liga juvenil iha nivel nasional no nivel munisipiu iha Baucau, Viqueque, Covalima. Liga sira ne’e sei hamosu jogador sira ne’ebé mak sei bele integra iha selesaun nasional. Liga sira ne’e FFTL realiza ho fundus husi FIFA, AFC, AFF no patrosinador sira seluk.

#FoinSaeMillennialForsaKriativa #DesportuIhaSosiedadenoPrestasaun

@copyrigth DNICT-SEJD 2020