DILI-Sekretáriu Estadu Juventude no Desportu, Eng. Abrão Nokosiku Saldanha, asina akordu ida, ne’ebé kontein target sira ba fulan neen dahuluk tinan-2021 nian, ho dirijente sira iha SEJD. Akordu ida ne’e, Sekretariu Estadu asina ho Diretor Jeral nain rua, Diretor Nasional nain hitu no Dirijente Unidade rua.

Koalia iha programa asinatura ne’e, Sekretariu Estadu Juventude no Desportu hatete katak “kaer ba kompromisu hirak ne’e mak diretor sira sei fahe serbisu ho chefe departamentu sira, no chefe departamentu sira fahe tutan tan serbisu ba funsionariu sira.”

“Serbisu sira ne’e mós interligadu, katak diresaun sira hotu presiza hamutuk atu atinji sira nia target. Ha’u ezemplu ida, se diresaun administrasaun no finansas lahalo serbisu diak no la atinji ninia target, diresaun nasional alta kompetisaun no diresaun desportu eskolar no komunitaria labele atinji sira nia metas. Nune’e mós, se diresaun sira lahalo sira nia serbisu ho diak, diresaun administrasaun finansas mós sei labele atinji ezekusaun orsamentu no atividade ho diak,” Sekretariu Estadu Abrão Saldanha esplika.

Kompromisu hamutuk ne’ebé asina ne’e sei sai baze ba dezempeñu ba dirijente sira no funsionariu sira hotu SEJD nian to’o fulan-Juñu tinan-2021. Asinatura ne’e hala’o iha Sexta, loron-5 fulan-Fevereiru tinan-2021 iha sala reuniaun SEJD, Lecidere, Dili.

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2021