DILI- Diretor Jeral Juventude no Desportu iha SEJD, David Tomas de Deus ne’ebé koordena ekipa tékniku konjunta husi Sekretaría Estadu haat halo aprezentasaun rezultadu serbisu koordenasaun ba Sekretariu Estadu sira, segunda loron 24 Agostu 2020 iha sala reuniaun Sekretariu Estado Kooperativas Bairo Formosa Dili.

Ekipa tékniku konjunta ne’e harii husi Sekretaria Estadu Igualdade no Inkluzaun, Sekretariu Estadu Juventude no Desportu, Sekretáriu Estadu Komunikasaun Sosial , Sekretariu Estadu Arte no Kultura iha loron 30 fulan Jullu 2020 hodi koordena programa no serbisu sira ne’ebé sira bele hala’o hamutuk iha nivel nasional no iha baze.

Diretor Jeral David Tomas de Deus aprezenta opsaun sira ne’ebé mak ekipa tékniku konjunta nia serbisu hamosu kona-ba oinsa atu operasionaliza instrusaun husi Sua Excellensia Primeiru Ministru ba Sekretariu Estadu nain haat atu halo serbisu hamutuk iha suku. Opsaun sira ne’e aprezenta hamutuk ho nia vantajen no desvantajen idaidak, ne’ebé hafoin diskusaun klean, Sekretariu Estadu nain haat opta ona ba opsaun ida. Sekretariu Estadu sira fo orientasaun ba tékniku sira atu hakonu informasaun no dadus sira ba opsaun ida ne’ebé sira hili ona, antes aprezenta ba Primeiru Ministru.

Membru ekipa konjunta nian halo ona diskusaun iha SEJD, iha loron-17 fulan-Agostu tinan-2020, hodi diskuti opsaun téknika sira relasiona ho implementasaun instrusaun Primeiru Ministru nian sobre serbisu ba povu iha suku, liuliu serbisu ba grupo feto no vulneravel, juventude no grupos tradisionais sira.

SEJD nia reprezentante iha ekipa téknika konjunta mak Diretor Jeral Juventude no Desportu, David Tomas de Deus ho Asesor Ezekutivu, Parseria no Komunikasaun, Edio José Maria Guterres.

#FoinSaeMillenialForsaKriativa #DesportuIhaSosiedadenoPrestasaun

EJMG//FBdJ//RM @copyrigth DNICT-SEJD 2020