DILI- Diresaun Nasional Desportu Edukasional no Komunitária (DNDEK) iha Sekretária Estado Juventude no Desportu (SEJD) halo mapamentu ba fatin turistiku kruz bo’ot foho Taululi Camea, Sexta  loron 24 jullu 2020.  Objetivu mapamentu ne’e mak atu identifika área sira ne’ebé sei utiliza ba atividade desportu rekreativa.

Diretór Nasional Desportu Edukasional no Komunitária Guido Monteiro hatete atividade ezersísiu ba fatin refere komunidade no juventude sira hahu tiha ona no ho mapamentu ne’e  bele tulun atividade sira ne’ebé liga ho desportu rekretaivu nomos turismo tamba iha ona marka sinais ne’ebé sei tau iha fatin sira ne’ebé identifikadu nudar mata dalan.

“ Objetivu ne’e hakarak halo mapamentu ida, oinsa fo sinais ba ita nia komunidade sira para bele lao tuir, tamba fatin ida ne’e laos ba Bidau no Camea oan deit, mais ba ema hot-hotu ne’ebé mak iha sidade Dili hakarak halo ezersísio ba fatin ida ne’e, entaun ami husi SEJD liu husi Diresaun Nasional Desportu Edukasionál Komunitária hakarak mai para halo mapamentu ba fatin ida ne’e, para oinsa ita nia komunidade sira bele lao tuir fatin sira ne’e, tamba fatin ida ne’e ita hatene katak fatin turistiku no kultura nian, ho ida ne’e parte husi guverno mos konsidera fatin hanesan ba desportu rekreativu komunitaria nian, tamba guvernu nia politika hakarak lori desportu ba komunidade, entaun inisiativa husi guvernu nian hakarak mai para atu halo mapamentu, hodi nune’e ita nia komunidade no juventude no mos ba ema hot-hotu ne’eb”e hakarak mai halo ezersísio iha ne’e no lao tuir sinais ne’ebe mak ami sei tau iha oin, planu seluk mak ida ne’e bele halo desportu extrim nian. Fatin ida ne’e hanesan fatin turistiku no fatin ida ne’e bele dehan sagradu no ita labele estraga fatin ida ne’e, entaun ita tenke tuir sinais ne’ebe parte guvernu prepara ona ,” dehan Diretór Guido.

Maria Moniz estudante ida husi Departementu Desportu Fisika UNTL nian ne’ebé partisipa mós iha atividade ezersísiu no mapamentu ne’e apresia tebes ho atividade refere tamba alende halo ezersísiu promove mos turismo no hadomi natureza.

“Desportu rekreativa ne’e ba ami nia departamentu ne’e rasik, ida ne’e foin primeira vez ami partisipa, no apresia tebes tamba bele halo servisu hamutuk ho SEJD nune’e ami bele aproveita, wainhira halo desportu rekreasi no mós ida ne’e hanesan ezersísio hodi nune’e ita bele moris saudavel no liu husi desportu rekreasi ida ne’e habelar liu tan no oinsa juventude hadomi liu tan natureza no vantajen mai ami no nafatin promove no mós buka hatene nafatin oinsa natureza no espesial liu ba desportu no nafatin kuidadu saude no nafatin vida saudavel,” hatete Maria Moniz.   

  
Hakerek husi: Frederico Branco de Jesus
Editór : Robert Mendonça
@COPYRIGHT2020# DNICT-SEJD#