DILI- Prezidente Komisaun Reguladora Arte Marsial (CRAM), Octavio da Conceição “Anus” asina kontratu ho Firma Jurídiku Sosial (J,US) Timor-Leste hodi formaliza serbisu hamutuk entre parte rua ba hamosu pakote lejislasaun ba Arte Marsial iha Timor-Leste. Asinatura kontratu ne’e hala’o iha Sexta, loron-22 fulan-Janeiru tinan-2021 iha sala reuniaun SEJD, Lecidere, Dili.

Koalia durante seremonia asina kontratu ne’e, Prezidente CRAM hatete “objetivu husi produsaun legislasaun arte marsial hanesan baze fundamental ida, ba polítika ne’ebé mai husi Sua Excellencia Sekretariu Estadu Juventude no Desportu atuál, Eng. Abrão Nokosiku Saldanha kona-ba reintegrasaun Gropu Arte Marsial iha sosiadade no sira nia enkuadramentu Timor-Leste nia iha Sistema Desportu Nasional.”

Prezidente CRAM esplika liu tan katak “polítika ne’e rasik mosu ho objetivu atu fo espasu ba foin-sa’e Timor oan tomak ne’ebé pertense ba Gropu Arte Marsial, atu sira bele partisipa iha modalidade desportu ne’ebé iha no fo opurtunidade mós ba juventude sira atu partIsipa iha prosesu Dezenvolvimentu Nasional.”

Prosesu ba preparasaun no produsaun pakote lejislasaun ida ne’e Governu, liu husi Sekretaría Estadu Juventude no Desportu hala’o ho prosesu konkursu públiku, ne’ebé partisipa husi firma jurídika 7 no manan nain ikus nian mak J,US Timor-Leste.

Ho asinatura ida ne’e, sei hahu prosesu tomak, ne’ebé sei inklui prosesu konsultas ho parte relevante sira.

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2021