CNJTL: VIII Governu Mai Tenke Tau Matan Ba Jovens Dezempregu

Nia hateten, la importa semak manan iha elisuan antesipada ne’e, importante hakarak ga lakohi govenru foun mai tenke fo espasu ba foinsa’e sira ne’ebe durante ne’e seidauk hetan servisu.
“Atu nune’e, bele hadia sira nia vida ekonomi ne’ebe diak,” nia hateten.
Tuir nia, durante ne’e joventude sira husi munisipius tun hotu mai Dili hodi buka moris iha ne’e tanba Dili mak nudar sentru ba tempu ida agora ne’e.
“Oinsa maka governu foun mai bele fo espasu kria servisu hanesan iha setor turismu, agrikultura e area hirak ne’e natoon ba sira atu servisu ba,” nia hateten.
“Hanesan infra-estruturas iha ne’ebe mak iha oi-oituan bele fo espasu ba joven sira bele servisu, atu nune’e bele hadia sira nia vida no sustenta vida familia uma laran.”
Ejizensia hanesan mai mos husi Joventude Juvencio da Silva Correia, husu ba governu foun mai atu kria kampu servisu ba joventude sira, liu-liu sira ne’ebe seidauk hetan servisu.
“Iha tinan 5 mai ne’e, sira tenki halo buat ruma atu oinsa maka bele halakon dezemprego iha rai laran,” nia hateten.
Alende ne’e, nia dehan governu foun mai mos tenke kria formasaun professional oi-oin ne’ebe bele fasilita joven sira bele kapasita sira nia aan ho diak liu tan.
“Ho nune’e maka sira rasik emprega ba sira nia aan,” nia dehan.
Entretantu Joventude Leonardo Pinto husu ba VIII Governu Konstituisional mai ne’e tenke kria programas ba joventude sira, reduz taxa dezemprego iha rai laran tanba kada tinan joven dezemprego ne’e aumenta ba bebeik.
“Ita haree joven barak mak halimar deit iha dal-dalan sira hanesan iha Largo, Palacio nia oin iklui iha Tasi tolu loron kalan mak joven sira ne’e tur grupo iha fatin sira ne’e,”nia hateten.
Tanba iha nia observasaun durante tempu kampanha, katak partidu sira ne’ebe avansa iha elisaun antesipada, ladun koalia kona ba programa ba joventude sira.
“Sira ladun koalia kona ba joventude nian, partidu sira interese liu koalia deit sira nia istoria pasadu nian,” nia proekupa.
Alende ne’e, nia mos husu ba joventude sira hotu atu fo liman ba malu, hametin unidade nasional, paz no estabilidade iha rai laran.