Sekretariu Estadu Juventude no Desportu Sorumutu Ho GIZ Nia Country Coordinator Iha Timor-Leste.

By Admin 09 Agostu 2020, 11:01:30 TLs JUVENTUDE
Sekretariu Estadu Juventude no Desportu Sorumutu Ho GIZ  Nia Country Coordinator Iha Timor-Leste.

Fotografia : S.E Abrão Nokosiku Saldanha sorumutuk ho GIZ nia Country Coordinator iha Timor-Leste. Imajen/DNICT


DILI- Sekretáriu Estadu Juventude no Desportu, S.E. Eng. Abrão Nokosiku Saldanha, hasoru malu ho Country Coordinator Ajensia Kooperasaun Internasioál Alemaña (GIZ, sigla Alemaña) iha Timor-Leste, Rainer Schellhaas ho ekipa iha sala reuniaun SEJD nian iha Lecidere Dili, kuarta loron-5 fulan-Agostu tinan-2020.

Iha sorumutu ne’e,  Rainer Schellhaas hato’o informasaun ba Sekretáriu Estadu kona-ba programa sira ne’ebé GIZ implementa iha Timor-Leste. Dadaun ne’e, iha programa boot haat (4) ne’ebé GIZ hala’o hela mak; ida, Promosaun oportunidade ba empregabilidade no jera rendimentu ba grupo marjinalijadu sira; daruak, Suporta dezenvolvimentu pasífiku liu husi promove empregu ba ema marjinalizadu sira; tolu, Fo assesoria no formasaun iha industria marítima sira no dahaat mak Juventude sira nia papel iha promosaun koezaun sosiál.

Sekretariu Estadu agradese GIZ ba apoiu tomak ne’ebé fo mai SEJD durante ne’e no husu atu iha diskusaun tékniku no detallu liu tan ba oinsa atu serbisu hamutuk diak liu tan ba oin. Iha biban ida ne’e mós Sekretariu Estadu esplika vizaun ne’ebé sei gía programa no atividade sira iha área juventude no desportu durante ninia mandatu. Sekretáriu Estadu hatete vizaun ba área juventude mak “FOIN-SA’E MILLENIAL FORSA KRIATIVA” no iha área desportu mak “DESPORTU IHA SOSIEDADE NO PRESTASAUN.”

Sekretáriu estadu esplika liu tan katak Timor-Leste sai nu’udar país mais joven iha rejiaun Ásia Pasífiku no ba ida ne’e prioridade ida mak atu enkoraja joven sira atu fila fali ba partisipa iha atividade produtivu sira. Nune’e, joven sira la’os deit involve iha atividade ekonómika maibé mós hola parte ativa no pratika dezenvolvimentu ida ne’ebé sustentavel.

GIZ mós entrega motorizada tolu ba SEJD ne’ebé sei bele tulun SEJD hala’o ninia serbisu.

 

#FoinSaeMillenialForsaKriativa  #DesportuIhaSosiedadenoPrestasaun
@copyrigth DNICT-SEJD 2020




Hakerek Komentariu Iha Facebook

Hakerek Komentariu Iha Account Facebook

Write a comment

iha 4 Komentariu ba informasaun ne'e

Hare Komentariu Hotu-Hotu

Hakerek Komentariu