SEJD inagura Estadio Municipal cafe de Ermera
Inagura Estadio Municipal cafe de Ermera

By Admin 29 Agostu 2019, 14:38:11 TLs DESPORTU
SEJD inagura Estadio Municipal cafe de Ermera

Keterangan Gambar : SEJD INAGURA ESTADIO MUNICIPAL CAFÉ DE ERMERA


Gleno-Ermera, Tersa (20/08/2019) – Mehi povu Ermera atu iha nia estadiu rasik, ikus realiza duni iha 20 Agostu 2019, Sekretáriu Estado Juventude no Desportu (SEJD), Nelyo Isaac Sarmento akompana Prezidenti Autoridade Munisipiu Ermera, Jose Martinho dos Santos Soares offisialmente inagura Estadio Munisipal de Café de Ermera.

“Ermera oan sira, imi nia estadiu mak ida ne’e. Mesmo seidauk kompletamente hanesan estadiu ida ne’ebe imi hare bebeik iha nasaun sira ne’ebe avansadu, maibe pelu menus ho estadiu ida ne’e no infraestrutura ne’ebe naton, imi nia tempu atu pratika desportu, laos deit futebool,” dehan sekretariu estadu Nelyo Isaac Sarmento iha nia deskursu.

Sekretariu Estadu ne’e mos informa, estadiu Café de Ermera iha tinan oin mos sei sai uma nain ba modalidade futebol ba jogos CPLP 2020 ne’ebe Timor-Leste sai uma nain ba festa desportu nasaun lingua Portugues sira ne’e.

“Iha fulan Outubru nia laran, ne’ebe agora tenta hela atu halo jogu amigavel internasional primeiru iha estadion Ermera ida ne’e, ne’ebe imi Ermera oan sira susesu duni no imi bele sai uma nain diak ba jogus sira ne’ebe tuir mai,” hatutan sekretariu estadu.

Ho estadiu foun ne’e, Prezidente Autoridade Munisipal Ermera, José Martinho dos Santos Soares espera bele hamosu jogador selesaun nasional hosi Ermera oan.

“Agora estadiu iha ona, tenke badinas mai treinu, para aban bainrua Ermera oan sira balun sai jogador iha nivel nasional to’o nivel internasional,” dehan Prezidenti Autoridade Ermera ne’e.

Inagurasaun ne’e halo ho seremonia kua fita no asina plaka hosi sekretariu estadu no jogu amigavel entre ekipa futebol SEJD vs Funsionariu Autoridade Munisipiu Ermera.

Alende ne’e, sekretariu estadu lansa training centre (TC) ba atleta sira hosi modalidade 12 ne’ebe sei compete iha SEA Games Manila iha Dezembru 2019.

Nune’e mos iha inagurasaun ne’e atribui mos premiu ba atleta prestasaun sira ne’ebe hamorin ona naran Timor-Leste iha internasional.

Total orsamentu ne’ebe governu aloka ba kontrusaun estadiu ne’e fofoun US$ 1,169,672.63 no kaer hosi kompania Maferdi Unipessoal.lda. Maibe iha nia implementasaun, kompania ne’e iha tinan 2015 wainhira halao obra ne’e to’o 2017 la konsege remata, maski halo ona pagamentu US$ 336,469.90.

Ho osan restu US$ 833,202.73, ikus governu foti dezisaun hapara kompania Maferdi no kontinua fali ho kompania SMS Contruction. Hafoin halo verifikasaun, governu aumenta osan tan US$ 318,340.25, no total sae US$ 1,151,542.98.

Ikus tamba iha adisional ba item balun hanesan parking area no variation order, governu aumenta tan osna addisional US$ 78,665.77 no total orsamentu ne’ebe governu halo pagamentu ba kompania SMS Construction hamutuk US$ 1,230,208.75.

@COPYRIGHT2019#MEDIAGABSEJD#




Video Ligasaun:


Hakerek Komentariu Iha Facebook

Hakerek Komentariu Iha Account Facebook

Hare Komentariu Hotu-Hotu

Hakerek Komentariu