Baucau Mellor Kontejenti iha Jogos FND
FND

By Admin 18 Setembru 2019, 08:18:05 TLs DESPORTU
Baucau Mellor Kontejenti iha Jogos FND

BAUCAU, 12 Setembru 2019 – Munisipiu Baucau ne’ebe sai uma nain ba jogos Festival Nasional desportu (FND) ba dala V, sai mellor kontijenti ba jogos desportiva refere.

Hosi modalidade 4 ne’ebe kompete iha FND, Baucau konsege sai kampiaun ba Futebol, Basketboll (mane) no iha atletismu nian hosi numeru feto 10.000 metrus ne’ebe hetan hosi Joaninha P.J Hornai.

Dezisaun ne’ebe Komisaun Organizadora FND halo kona ba mellor kontijenti ne’e hetan protesta makas hosi kontijenti Ermera ne’ebe hetan medalla osan mean barak liu ho medalla osan mean 4 kompara ho Munisipiu Baucau ne’ebe hetan deit 3.

Maske mosu protesta kona ba mellor kontijenti, enjeral, FND lao ho susesu no hetan partisipasaun hosi total atleta ema 1.030.

Sekretariu Estadu Juventude no Desportu, Nelyo Isaac Sarmento kongratula ba Munisipiu Baucau ne’ebe susesu realiza FND.

“Parabens hotu ba atleta hotu ne’ebe sai vensedor iha FND,” dehan Nelyo Isaac Sarmento, iha seremonia enseramentu FND, Kinta (12/9/2019), iha Estadiu Tadeu Lay-Kana Munisipiu Baucau.

Sekretariu estadu hatutan, iha desportu so uniku moto ida lori ema ne’ebe hare malu ladiak ba diak. “Iha desportu lori ita atu haforti ita nia relasaun humanu nudar ema, nomos haforti ita nia relasaun nu’udar Timor oan. Tamba ne’e iha desportu laiha inimigu, iha desportu iha deit esperitu sportif,” dehan sekretariu estadu.

Ba atleta sira ne’ebe lakon, sekretariu estadu motiva nafatin atu kontinua treinu no esforsu atu nune’e bele manan fali iha FND VI ne’ebe sei halao iha Munisipiu Dili tinan 2021.

Sekretariu Estadu mos hakfodak ho dezisaun Komisaun Organizadora ne’ebe anunsia kona ba mellor kontijenti ne’ebe tuir regras desportiva, kontijenti ne’ebe hetan osan mean barak nia mak sai vensedor.

“Atu halos deit buat balun iha situasaun ida ne’e, ohin avizu kapas tebe-tebes ne’ebe barak hetan medalla. Maibe, normalmente ita hakarak hateten ita kuandu koalia konaba modalidade ho premus barak, bainhira ita koalia konaba kontezente ne’ebe hetan medalla osan mean barak liu,” nia dehan.

Iha fatin hanesan, Prezidenti Autoridade Munisipiu Baucau nudar mos Prezidenti Komisuan Organizadora FND 2019 hatoo agradese ba Sekretaria Estadu Juventude no Desportu ne’ebe kontinua nia komitmentu hodi realiza FND iha Baucau ne’ebe konsege pendenti liu ona tinan ida hosi nia tempu ne’ebe determina.

“Kongratula mos ba povu Baucau ne’ebe hamutuk lori susesu ba FND iha ita nia rai doben Baucau,” hateten Antonio A. Guterres.

Albertina da Costa, atleta hosi Munisipiu Lautem ne’ebe hetan medalla rua (osan mutin iha numeru 10.000 M no osan metan iha numeru 5.000 M) senti kontenti ho prestasaun ne’ebe nia hetan.

“Hau kontenti bele hetan osan mutin ho osan metan ida, no hau sei esforsu nafatin ba oin hodi hetan osan mean,” komentariu Albertina.

FND ba dala VI sei realiza fali iha Kapital Dili iha tina 2021 ho modalidade liu modalidade 4 ne’ebe dadauk ne’e hetan.


REZULTADU FINAL FND 2019

NO MUNISIPIU G S B T
1. ERMERA 4 2 0 6
2. BAUCAU 3 2 3 8
3. LAUTEM 2 1 2 5
4. DILI 1 3 5 9
5. MANUFAHI 1 2 0 3
6. MANATUTO 0 1 0 1
7. BOBONARO 0 0 1 1
8. AILEU 0 0 0 0
9. AINARO 0 0 0 0
10. COVALIMA 0 0 0 0
11. LIQUISA 0 0 0 0
12. VIQUEQUE 0 0 0 0
13. RAEOA 0 0 0 0

@COPYRIGHT2019#MEDIAGABSEJD#




Video Ligasaun:


Hare Komentariu Hotu-Hotu

Hakerek Komentariu