Sekretariu Estadu Juventude no Desportu Lansa Zona Livre husi Veikulu

By Media DNICT 01 Setembru 2020, 07:14:21 TLs DESPORTU
Sekretariu Estadu Juventude no Desportu Lansa Zona Livre husi Veikulu

Fotografia : Sekretáriu Estadu Juventude no Desportu Eng. Abrão Saldanha akompaña husi Ministru Edukasaun, Juventude no Desportu Dr. Armindo Maia no entidade sira partisipa exersisiu fisika hafoin lansa atividade zona livre husi veikulu. Imajen/DNICT


DILI- Sekretariu Estadu Juventude no Desportu, Eng. Abrão Saldanha lansa atividade “Zona Livre husi Veíkulu” sexta, loron-28 fulan-Agostu tinan-2020. Hola parte mós iha lansamentu ne’e, Ministru Edukasaun, Juventude no Desportu Dr. Armindo Maia, Ministru Turizmu, Komersiu no Industria, Dr. José Lucas do Carmo da Silva, Ministru Petroleu no Rekursu Naturais, Dr. Victor da Conceição Soares, Vice-Ministru Interior, Dr. Antonio Armindo, Sekretariu Estadu Meieu Ambiente, Deometrio do Amaral de Carvalho no Sekretariu Estadu Komunikasaun Social, Mericio Juvenal dos Reis “Akara”.

Sekretariu Estadu Juventude no Desportu hatete Objetivu husi zona livre veíkulu ne’e mak atu fo espasu ba ema hotu atu halo atividade fíziku no kontribui ba hatun Timor-Leste nia inatividade. Atividade Zone Livre husi Veíkulu ne’e sei hala’o fulan-fulan.

Sekretariu Estadu Meiu Ambiente esplika, maske Timor-Leste nia kontribuisaun ba emisaun gas global kiik los, 0.003% deit, maibé atividade ida ne’e sei kontribui ba hatun polusaun iha Timor-Leste no expressa ninia esperansa atu bele extende liu tan zona ida ne’e iha tempu oin.

Ministru Edukasaun, Juventude no Desportu husu ba ema hotu atu aproveita espasu zona livre husi veíkulu ne’e hodi halo atividade fízika, desportu nune’e garante ema moris saudavel no divertidu.

Sekretariu Estadu Meiu Ambiente no Ministeru Edukasaun, Juventude no Desportu fo parabens ba Sekretariu Estadu Juventude no Desportu ba inisiativa diak ida ne’e.

Hola parte mós iha atividade zona livre veíkulu ne’e atleta futeból juvenil sira, atleta atletismu, organizasaun arte marsial sira ne’ebé hatudu atrasaun, no mós jumba. Iha mós jogu futeból salaun, basketbol no voleybol, hafoin partisipante sira marsa husi Kaza Eropa nia oin ba to’o Ponte BJ Habiebie.

#FoinSaeMillennialForsaKriativa #DesportuIhaSosiedadenoPrestasaun

Edjmg//Joqi//FBdJ//RM@copyrigth DNICT-SEJD 2020




Hakerek Komentariu Iha Facebook

Hakerek Komentariu Iha Account Facebook

Hare Komentariu Hotu-Hotu

Hakerek Komentariu