KOMUNIKADU IMPRENSA

SEKRETARÍA ESTADU JUVENTUDE NO DESPORTU LUTU DALA IDA TAN IHA PERIODE DE TEMPU MENUS HUSI FULAN TOLU

Ohin, seidauk completa fulan tolu, Sekretaría Estadu Juventude no Desportu lakon tan ninia funsionariu ida, matebian João Celestino. Matebian husik nia iss ikus iha loron-7 fulan-Otubru tinan-2020, iha munisipiu Bobonaro.

“Ohin ba segunda vez, SEJD tomak simu tan notisia tristeza ida husi Maliana tamba lakon ami nia funsionariu ida, matebian João Celestino. Ha’u lembra didiak, seidauk fulan 3 liu ba mak SEJD lakon matebian Alvarito iha Lospalos,” Sekretariu Estadu Juventude no Desportu, Eng. Abrão Saldanha hatete.

“Lori ha’u nia naran rasik no lori Sekretaría Estadu Juventude no Desportu tomak nia naran, ha’u hato’o ami nia sentidus pézames no simpatia kle’an ba Matebian nia kaben no oan sira ne’ebé nia husik hela. Ami harohan atu matebian hetan fatin deskansa rohan laek nian iha Nai Maromak nia reinu no família tomak hetan forsa no korajen atu simu lakon ida ne’e,” Sekretariu Estadu hatutan.

Matebian João Celestino hahu ninia kna’ar nu’udar funsionariu públiku iha Sekretaría Estadu Juventude no Desportu iha fulan-Abril tinan-2014. Durante ne’e matebian mak funsionariu SEJD nian iha Munisipiu Bobonaro.

“Dala ida tan, SEJD sente triste tamba lakon funsionariu ida ne’ebé sei bele kontribui barak liu ba dezenvolvimentu juventude no desportu iha Timor-Leste. Liuliu, tamba tinan oin SEJD hahu atu presta serbisu barak liu tan iha baze iha área juventude no desportu,” Sekretariu Estadu Abrão Saldanha subliña.

Hafoin simu tiha notisia kona-ba matebian Julio Celestino nia mate, Sekretáriu Estadu fo kedas orientasaun atu SEJD fo apoiu ruma ba familia hodi ajuda iha prosesu funeral matebian nian. Sekretariu Estadu Juventude no Desportu sei reprezenta husi delegasaun ida iha matebian João Celestino nia seremonia fúnebre, ne’ebé tuir planu sei hala’o iha loron-8 fulan-Outubru tinan-2020 iha munisipiu Bobonaro. SEJD mós sei husu misa Requem ida ba matebian iha Dili.

Matebian João Celestino husik hela nia kaben Sra. Natalia Motu Araujo no oan mane nain haat, Diamantino da Cunha Celestino, Joel da Cunha Celestino, Roberto da Cunha Celestino no Dedilson da Cunha Celestino.

RAMATA