DILI- Sekretáriu Estado Juventude no Desportu Eng. Abrão Nokosiku Saldanha hasoru malu ho Ministru Administrasaun Estatal, Dr. Miguel Pereira de Carvalho iha sala reuniaun Ministeriu Estatal nian Iha loron-11 fulan Fevereiru tinan-2021.

Sorumutu ida ne’e membru governu nainrua koalia kona-ba serbisu sira iha area juventude no desportu ne’ebé atu hala’o iha nivel munisipiu, postu administrativu no suku sira iha teritoriu laran tomak. Serbisu sira ne’e inklui; estabelesimentu unidade serbisu iha postu sira, estimulasaun produtividade joven sira nian, serbisu sira membru Parlamentu Foin-Sa’e nian, centru juventude sira no mós realizasaun Festival Nasional Desportu (FND) no mós Desportu Eskolar no Desportu Komunitaria no seluk tan.

Durante diskusaun, membru governu nainrua ne’e konkorda atu hamosu akordu inter-orgánika ida ne’ebé sei ajuda implementasaun asuntu sira ne’ebé sira diskuti ho diak no mós estabelese baze legal balu.

Sua Excellencia Ministru Estatal no Sua Excellencia Sekretariu Estadu orienta ekipa tékniku husi entidade rua ne’e hodi tur hamutuk halo diskusaun tékniku sira ba hamosu akordu inter-orgánika.

Akompaña Sekretariu Estadu Juventude no Desportu iha enkontru ne’e mak Diretor Jeral nainrua, Diretor Nasional no asesor sira. Entretantu, Ministru Administrasaun estatal akompaña husi diretor nasional sira no mós asesor sira ministeriu nian.

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2021