DILI- Sekretáriu Estadu Juventude no Desportu Eng. Abrão Nokosiku Saldanha sai orador iha programa Talkshow Editor’s Club ne’ebé organiza husi Asosiasaun Jornalista Timor-Leste (AJTL) iha sala reuniaun Konsellu Imprensa Kintal Boot Dili, Kuarta loron-23 fulan-Setembru tinan-2020.

Tema ba Sekretariu Estadu nia intervensaun mak “SEJD nia Polítika ba Dezenvolvimentu Juventude iha Era Millennial, Liuliu iha Tempu Pandemia COVID-19.”

Iha ninia intervensaun, Sekretariu Estadu konvida jornalista sira atu apoiu SEJD nia programa ba publika istoria susesu joven sira nian.

“Ohin loron, joven sira jerasaun idade ha’u nian trinta mai kraik ne’e, sofre estigma boot ida iha ita nia sosiedade. Mak saida? Ema bolu sira trouble-maker, halo problema dor,” Sekretariu estadu esplika.

“Entaun iha programa ida bolu ‘Success Story’ atu dudu sai istoria susesu sira joven nian. Ida ne’e para ema atu hare fila fali katak joven sira la’os ida troublemaker deit, maibé sira iha susesu barak.”

Ezemplu ida ne’ebé ita bele hare mak atleta Teófilo. “Atleta Teófilo ne’e ho defisiensia, nia konsege lori ita nia naran fera rekor Asiátiku. Teófilo konsege halo ema koñese ita Timor-Leste,” hatete Sekretariu Estadu.

Governante ne’e enkoraja jornalista sira kria konteudo sira kona-ba istoria susesu foinsa’e sira nian ezemplu mak Atleta Teófilo Freitas , atleta ne’ebé fera rekor Asiátiku iha modalidade halai metru 400 klase T37 ho tempu 53.14 segundu iha Asian Para Games tinan-2018. Teófilo nia rekor ida ne’e seidauk iha atleta seluk marka rekor foun to’o ohin loron.

Ezemplu ida seluk, mak joven ida ho idade menus husi tinan 27, ne’ebé ohin loron ema koñese liu ho naran Bandido Kualidade, ne’ebé mak ohin loron sai emprezariu susesu ida no hetan kobertura iha notisiariu internasional balu.

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2020