Fotografia : Inkontru no rona preokupasaun hosi federasun 8 ne’ebe sei sai modalidade iha jogos CPLP 2020 nian, Komisaun Teknika Akompanamentu (CTA) sei fo apoiu teknika balun ba federasaun sira durante implementasaun jogos CPLP ne’ebe sei halao iha Jullu 2020, iha Dili no Gleno, Timor-Leste

DILI – Hafoin halo inkontru no rona preokupasaun hosi federasun 8 ne’ebe sei sai modalidade iha jogos CPLP (Comunidade Pais Lingua Portugues) 2020 nian, Komisaun Teknika Akompanamentu (CTA) sei fo apoiu teknika balun ba federasaun sira durante implementasaun jogos CPLP ne’ebe sei halao iha Jullu 2020, iha Dili no Gleno, Timor-Leste.

Iha inkontru ne’e, Federasaun Xadrez Timor-Leste (FDTL) esklarese katak teknikamente federasaun preparadu realiza nia modalidade iha jogos CPLP.

“Ami husu deit para bele aumenta numeru atleta ne’ebe kompete kada paiz minimu 3 ou 4, tamba 2 menus liu,” informa Zeferino Viegas Tilman, Prezidenti FDTL.

Nune’e mos hosi Federasaun Taekwondo Timor-Leste (FDTL), maski preparadu, maibe sira sei menus ekipamentu ba jogos nian.

Prezidente Konfederasaun Desportu Timor-Leste (CDTL), Afranio Xavier Amaral ba jornalista sira informa, parte CTA-CPLP konkorda ona sei fo apoiu teknika balun ba federasaun 8 ne’ebe sei menus ekipamentu no rekursu umanu, liliu iha arbitrazem nian.

“Agora adadaun hanesan confederasaun ohin atu salienta deit ba tekniku atu halo preparasaun liu-liu ba modalidade 8 ne’ebe maka atu hola parte iha jogu CPLP. Depois esplikasaun husi CTA-CPLP nian hateten katak ita falta husi arbitrazem, klaru katak ita nia arbitrazem hetan ona formasaun husi federasaun internasional. Maibe, tamba ita uza lingua Portugues, iha federasaun balun nia rekusu seidauk sufisiente presiza atu suporta delegasaun teknika ida atu mai orienta ita atu halo manual kompetisaun, tamba manual kompetisaun tenke halo ho lian Portugues, ” esplika Afranio, Tersa (28/01/2020), iha Salaun inkontru SEJD, Lecidere, Dili.

Gerson Mello nudar Koordenador Desportu CPLP atual Koordenador CTA ba Jogos CPLP 2020 garantia katak CTA sei fo apoiu teknika tantu rekursu umanu no ekipamentu sira ne’ebe presiza iha jogos refere.

“Ba arbitrazem no ema teknika ami sei apoiu, inklui ekipamentu balun ne’ebe iha jogos antes ita bele uza iha jogos agora,” dehan Gerson Mello.

Laos deit ba ema ho kondisaun fiziku normal, Jogos CPLP mos sei inklui jogos paralimpico ne’ebe sei iha deit modalidade atletismu.

Koordenador Komisaun Jogos CPLP 2020 atual membru CTA-CPLP no Diretor Nasional Desportu Alta Kompetisaun SEJD, João Rodrigues esklarese katak inkontru entre CTA-CPLP ho CDTL no federasaun 8 ne’e nudar kontinasaun atividade CTA-CPLP nian ne’ebe halo vizita loron 5 iha Timor-Leste hodi hare progressu ba preparasaun uma nain.

Alende vizita infraetrutura ba fatin jogos nian, CTA-CPLP mos vizita hotel sira ne’ebe sei sai fatin akomodasaun ba atleta hosi nasaun 9 ne’ebe sei kompete ba jogos refere, inklui halo inkontru ho governante sira nian hodi rona deretamente ba preparasaun hosi parte governu nian.

Iha jogos CPLP 2020 Timor-Leste, modalidade 8 ne’ebe lori ba kompete maka Atletismu, Futebol, Karate, Taekwondo, Xadres, Volley Praia, Basketbol (3 x 3) no tenis kampu.

Delegasaun CTA-CPLP ne’ebe halo vizita ba Timor-Leste ne’e maka Gerson Mello hosi Cabo Verde, Debora Carla (Brasil), Antonio Hora Filho (Brasil), Bobson Agular (Brasil), Euridiney de Assunção Pinto no Carlos Neves hosi São Tome e Príncipe.

Hakerek hosi: Frederico de Jesus

Editor: Evangelisto Santos Meilana

COPYRIGHT@2020#MEDIAGABSEJD#

---

Video Ligasaun: